de Salvatore Serra
Novidade pro sa terminologia in limba catalana. Est essidu un’agiornamentu de su Diccionari de seguretat alimentària (Ditzionàriu de sa seguresa alimentare) chi, cun sas ùrtimas annantas, gai si podet cunsiderare cumpletu e regollit unu totale de prus de 700 tèrmines. Su ditzionàriu in lìnia l’ant elaboradu su Tzentru de Terminologia TERMCAT e su Dipartimentu de sa Salude de sa Generalitat de Catalugna, cun sa collaboratzione de sos espertos de s’Agentzia Catalana de Seguresa Alimentare.
Sa prima editzione l’aiant publicada in su 2021, e giai cunteniat tèrmines relativos a sa seguresa alimentare, a sa calidade de sos alimentos e a sos sistemas de controllu e anàlisi de s’arriscu. Pro nàrrere, giai si podiant agatare tèrmines comente “additiu alimentari, alerta alimentària, anàlisi de perills i punts de control crítics, bones pràctiques d’higiene, estudi d’exposició, ingesta adequada, ingredient tecnològic, qualitat alimentària, risc alimentari, valor de seguretat o verificació”.
Como ant agiuntu prus de 200 boghes. Sos tèrmines noos pertocant sos perìgulos biològicos (anisakis, criptosporidi, estreptococ, listèria monocitògena, micobacteri, norovirus, salmonel·la), sos perìgulos chìmicos (bisfenol A, contaminant orgànic persistent, contaminant de procés, dioxines, ftalats, mercuri, micotoxines, nanoplàstic, residu de medicaments veterinaris) e sos perìgulos fìsicos (cos estrany, radiació).
Leave a comment