Su CSU cramat sa Regione

dae su Comitadu pro su Sardu Ufitziale retzimus e publicamus

————————————————————————–

S’est riunidu eris in videocunferèntzia su diretivu de su CSU, Comitadu pro su Sardu Ufitziale. S’est fatu analizu de sa situatzione generale de sa polìtica linguìstica e de sos primos duos annos de guvernu de sa giunta regionale de tzentrudereta ghiada dae sos sardistas. Su CSU, mancari ischende chi sa pandemia

at de seguru influidu, at su dovere de fàghere notare chi sas lìnias de sa polìtica pro sa limba sarda atuadas dae s’assessoradu regionale sunt insufitzientes e negativas. Sa gestione de sa lege de su 2018 est fallimentare, su sardu no at tentu perunu avantzamentu in sa sotziedade sarda e sa lìnia de sos ufìtzios regionales paret prus in favore de una dialetizatzione in variantes chi non s’afortigamentu de una limba comunitària. In prus s’assessoradu legìtimat operadores e progetos de peruna balia tècnica e culturale finantziende cale si siat grafia sena cabu. Totu custu fatu cun minuspreju de sas règulas democraticas mìnimas, sena chircare su cunfrontu cun espertos, sòtzios o opiniones diferentes. Sende custu s’istadu de sas cosas, CSU pedit a sa Giunta Regionale, e mescamente a su Presidente Sardista, un’interventu sèriu e coerente gasi comente promìtidu in sos programmas e in campagna elettorale. Su CSU s’at a fàghere parte ativa, in sos meses imbenientes, pro formare comitados de tzitadinos chi apant sa punna de defensare su prestìgiu e s’identidade unitària de sa limba sarda dae gestiones incompetentes e contraditòrias.