«Carchi die a como deo e Lorenzo nos semus cojuados cun ritu tzivile. L’amus fatu “in articulo mortis” ca onni die b’at una cumplicatzione fìsica noa, ca so a s’intra e bessi dae s’ospidale e oramai ponimus totu in contu. L’amus fatu a mala gana: essende·bi un’àteru mèdiu pro nos garantire pari-pari sos diritos, mai aìamus fatu su sèberu de custu istrumentu patriarcale e limitadu chi nos custringhet a reduire a sa rapresentatzione de sa còpia un’esperièntzia meda prus rica e forte, in ue su nùmeru 2 est su revessu de su chi semus. Perunu augùriu, duncas, ca su ritu chi cherimus galu non b’est. Ma bi l’amus a àere e cherimus contribuire a lu fàghere nàschere».
Sunt sos faeddos chi oe Michela Murgia nos at intregadu, faeddende de se, de sa maladia sua, de sa famìlia queer chi issa punnat (in ue contant prus sas relatziones chi non sos ruolos). E custos faeddos los agatamus peri sos artìculos de sas testadas online cumpartzidos in sas retes sotziale. Retes sotziales chi parent retes de fogna tanta est sa merda ghetada contra a s’iscritora. Merda chi connoschimus bene e chi bi l’ant ghetada cada borta chi issa at espressadu unu pàrrere in contu de diritos.
Chie, cunsiderende·si brulleri de vàllia ma cun punna de afrenta at iscritu “Auguri”; chie at partetzipadu s’”indiferèntzia” sua (partetzipende·la pro chi non siamus indiferentes nois); chie (su bonu) at manifestadu cumprensione pro sa cunditzione sua ma cundenna pro su restu; chie l’at cussigiadu de si colare sulena, sena faeddare, sas ùrtimas iscutas suas; chie l’at cussigiadu chi faghiat prima a s’indiritzare a carchi notaju imbetzes de criticare su cojuiu; chie gosi, chie gasi.
Gente chi non s’est galu sapida de èssere cumandada dae cada cosa chi narat Michela, ca rispondet in manera standardizada e automàtica che chi Kelledda matessi abbatigaret unu butone issoro, dende·lis oportunidade de allegare (mancari male). Torremus gràtzia a Murgia ca cada borta faghet essire a campu sos malos sentidos bòmbidos chi ànimant sa sotziedade nostra. Ca petzi connoschende·los amus a èssere a tretu de fraigare su revessu.
maùru piredda
Leave a comment