Su decretu Abodi, ativu dae su mese de martzu de s’annu coladu, narat chi sas cursas a caddu in fora de sas istruturas isportivas tocat de las fàghere sighende medidas de seguresa, siat pro su chi pertocat su pamentu e sa mannària de sa carrera, siat pro sa bestimenta de sos cabadderis. Caschetos, tzanchetas protetoras e àteros trastes chi male si cuncordant cun sas traditziones e sas caratzas de su carrasegare sardu a caddu, e non cun custas ebbia.
Sa Sartìglia e sa Carrela ‘e nanti sunt sa prus chi podent pèrdere bellesa e connotu, ma si abarrat gasi, sena leges de amparu o dèlegas, podent fintzas èssere in arriscu de sighire in sos annos chi benint. A ambas duas, difatis, li benit male a annànghere sas ainas inditadas dae su Ministèriu a sos costùmenes de carrasegare, ma li benit peus puru allarghiare sas carreras in ue colant cada annu sos caddos a parafua. Sos polìticos sardos, mescamente sos de Aristanis, sunt proende a agatare un’acordu a Roma, ma su fronte de sos assòtzios italianos de defensa de sos animales e de sos caddos cherent teteresa. A parre issoro su decretu Abodi fràigat unu livellu mìnimu de règulas pro sa tutela de sos animales. Istorbos chi ant tentu giai su mese de trìulas de su 2025 s’Àrdia de Sèdile chi at dèpidu batalliare cun sos prefetos e sos animalistas.
In su mentres, paret chi su fronte de sos amministradores sardos siat giai partzidu: dae un’ala su sìndicu de Sèdile chi narat chi non si podet ammisturare sa professone pro santu Antine cun sa falada de su Componidori ca, segundu a isse, giunghent una balia diferente meda; dae s’àtera sos tècnicos de sa Comuna de Aristanis sunt proende a sutalineare sos nùmeros bàscios meda de intzidentes e mortos, datos chi non agiudant a s’Àrdia.
Custa cuntierra intre Istadu e ìsula est s’esempru làdinu de s’esistèntzia de duas culturas chi sunt a tesu, non petzi pro su chi pertocat sos chilòmetros. Sa duda abarrat: prus seguresa o prus fidelidade a sa traditzione? Est craru però chi si su sèberu de su guvernu non s’at a mudare, sas cunseguèntzias sotziales, e fintzas pro su setore de sos caddos, ant a èssere graes meda.
Gabriele Tanda
Leave a comment