Fintzas in su 2026 torrat, cun su beranu, una de sas abitùdines prus chistionadas de s’annu: s’ora legale. In su note intre sàbadu 28 e domìniga 29 de martzu, sas fritzas de su rellògiu ant a brincare a in antis: a sas duas de mangianu s’oràriu at a inditare ufitzialmente sas tres. Sos dispositivos digitales ant a fàghere su “brincu” a sa sola, ma su fìsicu nostru podet èssere chi no siat lestru a sa matessi manera a s’adatare a pèrdere un’ora de sonnu.
Introduida de manera fissa in Itàlia in su 1966, s’ora legale naschet dae una netzessidade pràtica: pònnere de acordu sas atividades umanas cun su giru de su sole. Movende s’ora in antis, minimamus su consumu de energia pro s’illuminatzione artifitziale, cun un’efetu positivu siat pro sas bulletas e siat pro s’ambiente.
Ma sos profetos no sunt econòmicos ebbia. Sos seros prus longos arribant che a una tumbada pro su bonu istare de su corpus e de sa mente: sìntesi de sa Vitamina D, est a nàrrere prus tempus a sa lughe naturale; vida ativa, chi cheret nàrrere prus tempus pro s’isport e pro caminare a s’ària a pustis de su traballu; sotzialidade, unu megioru de s’umore chi agiuat a istare cun sos àteros.
Mancari sa lughe in prus, su contu de pagare pro su rellògiu biològicu nostru podet èssere caru. Su càmbiu de s’ora no est una pura curiosidade, ma una cunditzione chi mudat su ritmu tzircadianu. In sas dies a pustis, est normale a intèndere istrachidùdine, nerviosismu e fartas de cuntzentratzione, mescamente pro sos pitzinnos e pro chie est giai istressadu. Sa sièntzia, de cada manera, ponet in guàrdia contra a perìgulos prus graes. Chircas diferentes ant mustradu chi b’at una màssima de intzidentes istradales e de traballu causados dae sa farta de sonnu.
Ma su datu de tìmere benit dae sa cardiologia: un’istùdiu de su Journal of the American College of Cardiology at agatadu una crèschida de su 3-4 pro chentu de sos casos de infartu miocàrdicu acutu su lunis a pustis de su càmbiu de s’ora. Una pertzentuale chi pàret minore, ma bastante a pònere suta de pressione sos servìtzios de emergèntzia. In fines, s’ora legale abbarrat unu cumpromissu intre su bonu impreu energèticu e sa biologia umana. Preparàre s’organismu andende a drommire bìndighi minutos primu in sas dies in antis de su càmbiu, diat pòdere èssere su modu bonu pro si godire su sole sena iscutuladas malas pro su coro.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment