Comente càpitat a s’ispissu in beranu, sa Defensa at ammanigiadu in Sardigna unu perìodu de esertzitatziones militares, mutidu Joint Stars 25, chi at a èssere su prus mannu de ocannu. B’ant a èssere s’esèrtzitu, sa marina e s’aeronàutica, ma ant a partetzipare fintzas espertos informàticos, ispatziales e àteras agentzias militares, comente sos carabineris, e tziviles comente sas Universidades (de Gènova, sa LUISS e sa LUMSA de Roma, sa Sant’Anna de Pisa), ca s’idea est cussa de istudiare problemas e debilesas. Sa punna est cussa de si annestare a una gherra a sas làcanas de s’Europa e de sa NATO, comente narat su giassu de su Ministèriu de sa Defensa, e de ismanniare su poderiu de istorrare cale si siat fortza inimiga a atacare.
Sigomente s’infadu pro custas atividades est mannu in Sardigna e chi sa minetza de sa gherra ponet in pistighìngiu sa populatzione de totue. Su guvernu at aprontadu unu programma de atividades sanitàrias, isportivas e culturale pro pesare una mùtria prus bona in sos sardos. Cun su tìtulu “Un gesto meraviglioso come il sorriso di un bambino” at a lòmpere in su portu de Casteddu sa nae de gherra Trieste, pro si abèrrere a sos tzitadinos e fàghere controllos sanitàrios a sos pitzinnos, e s’at a fàghere, semper a subra de sa nae, unu cuntzertu de beneficèntzia. In sas carreras casteddajas s’at a tènnere sa cursa “IX Karalis 10”. Totu custa “operazione simpatia” tenet su patrotzìniu de sas istitutziones sardas e su dinari de aziendas meda, fintzas Leonardo, RWM e àteras chi produint armas.
Sos tempos sunt malos e no ispantat chi bi siant operatziones comente a custa. Però prus de unu pagu de assuconu lu ponet e l’espressant a craru fortzas polìticas maicantas de su Cussìgiu comunale in unu documentu essidu a campu eris. Pd, Alleanza Verdi Sinistra, Progressisti, Movimento 5 stelle, Orizzonte Comune e Sinistra futura denuntziant s’ipocrisia de fàghere atividades pro sa salude cando si aprontat sa gherra e chi unu cumportamentu gasi fragat de colonialismu: sas atividades culturales, isportivas e sanitàrias non sunt unu donu chi benit dae artu onni tantu, ma unu deretu chi bi diat èssere cada die. Argumentos chi ammentant cussos de sos indipendentistas chi lutant contra a sas bases dae annos.
Gabriele Tanda
Leave a comment