Su 6 de freàrgiu no est una data che a sas àteras. Est sa Die mundiale de sa tolleràntzia zero contra a sas mutilatziones genitales femininas, unu momentu pro chistionare subra a unu fatu chi, in su 2026, interessat galu milliones de pitzinnas e de fèminas in totu su mundu. Est una pràtica rituale isparghinada mescamente in cudda parte de s’Àfrica chi andat dae s’Egitu a sa Somàlia, e duncas atraessat su coro de su continente finas a s’Otzèanu Atlànticu, pertochende totu sas natziones chi istant in sa tzinta suta a su desertu de su Sahara.
Sa forma prus fea si narat infibulatzione (chi s’OMS descriet de “Tipu III”). Non tenet peruna base religiosa e prus che àteru est aprontada in cunditziones de pagu o nudda igiene. Sas vìtimas si bident segare a gurteddu o a lama sos genitales, in totu o in parte. A pustis, sa pedde de sas lavras de foras est cosida, lassende ebbia unu passadòriu pro su pìsciu e su sàmbene de su mese. Totu sena anestesia. S’iscopu est cussu de impedire a sas fèminas de àere raportos sessuales prima de afidare. Sas cunseguèntzias sunt emorragias, infetziones crònicas, complicàntzias mortales cando s’arribat a s’illieròngiu e tràumas psicològicos chi non s’ismèntigant mai. Est, in totu e pro totu, una negatzione de sos deretos a sa salude e a s’integridade fìsica.
In sos ùrtimos deghe annos, però, sa gherra contra a sas MGF non s’est arressa in sos tribunales ebbia, ma at sighidu in sas pratzas de sas biddas e in sas iscolas, gràtzias a sos programmas de educatzione comunitària. Maicantas comunidades in Àfrica e in Oriente ant fatu a ischire in modu craru chi tocat de l’acabbare cun custa pràtica. Sos resurtados si bident: oe una pitzinna, cunforma a trinta annos a como, tenet su trinta pro chentu de probabilidade in mancu de sufrire mutilatziones.
Su problema de s’infibulatzione no est mancu gasi a tesu dae a nois. Cun sas aundadas de migrantes, s’Itàlia tenet oe mìgias de fèminas chi portant sos sinnos de custa pràtica, e pitzinnas chi sunt in perìgulu mannu cando torrant a sos logos issoro pro biàgiu o pro passare tempus de fèria. S’isfida est, a un’ala, dare assistèntzia sanitària ispetzializada a sas vìtimas e, a s’àtera, istruire maistros e dotores pro cumprèndere sos sinnos de su perìgulu, dende a sas famìlias possibilidades de amparu. S’obietivu de s’ONU est de sessare in su totu sas MGF intro a su 2030. Mancant bator annos ebbia. Tzelebrare su 6 de freàrgiu cheret nàrrere a cunfirmare chi peruna traditzione balet prus de sa suferèntzia e de sa mancàntzia ìntima de libertade chi podet causare.
Bore Taras
Leave a comment