Su World Press Photo Contest est lòmpidu a sa de 68 editziones cun belle 60mìgia immàgines (59.320 su datu pretzisu) tiradas dae 3.778 fotògrafos de 141 Paisos. Unu resurtadu chi cunfirmat s’interessu peri su globu nostru pro su fotogiornalismu e sa fotografia documentària. De totu custas tzifras resurtant barantaduos sos iscatos seletzionados dae sa giuria. «Sas immàgines premiadas – leghimus in su situ de su cuncursu nòdidu – invitant sos ispetadores a nch’iscùdere sa mirada addae de su tziclu de sas novas e a si cunfrontare cun istòrias de totu su mundu importantes e discuidadas».
Ma ite est su chi nos mustrant custas istantàneas? «Sa batalla, su disafiu, ma finamentas su calore umanu e su coràgiu». De su restu su 2024 chi amus coladu l’amus a ammentare pro tempus meda che a un’annu prus chi no avolotadu a livellu polìticu e mediàticu. «Amus fatu sos sèberos nostros – narat sa presidente de sa giuria Lucy Conticello – mirende a su mix finale. Su prèmiu World Press no est ebbia unu reconnoschimentu mannu pro sos fotògrafos, chi su prus de sas bias traballant in cunditziones difìtziles, ma est fintzas unu resumu de sos eventos mundiales printzipales, mancari incumpletu. Comente giuria fìamus in cherta de immàgines a tretu de ingendrare allegas intre sas persones». Su tempus de s’urgèntzia, duncas, aunit su momentu de s’iscatu e sas arresonadas segutzianas proponende·nos chistiones fotografadas de màdrighe polìtica, ambientale, antròpica e de gènere.
«Su mundu no est prus su matessi – narat sa diretora esecutiva Joumana El Zein Khoury – de cando fundeint su World Press Photo, su 1955. In s’època nostra est prus fàtzile a nche bogare sa mirada, a iscùrrere a lestru, a si disimpignare. Ma custas immàgines non nos lu permitint. Atraessant sas mùidas custringhende·nos a reconnòschere su chi b’at capitende, finas cando est iscòmodu, finas cando nos imponet su meledu in riferimentu a su mundu chi semus bivende e a su matessi ruolu nostru in intro de issu». Inoghe sa mapa cun sas fotografias seletzionadas.
Gianfranca Orunesu
(Foto de Tara Winstead – Immàgine de repertòriu)
Leave a comment