Foto leada dae nfl.com
Su mangianu de lunis 9 de freàrgiu, domìniga in sos Istados Unidos, s’istàdiu de Santa Clara, in Califòrnia, est istadu teatru de sa de sessanta editziones de su Super Bowl.
Sa finale de su campionadu NFL de football americanu 2025 fiat intre sos Seattle Seahawks e sos New England Patriots, pro s’ocasione in màllia bianca.
Sa vitòria est andada a sa formatzione de s’istadu de Washington. Est istada una partida dominada dae sas difesas, cun sas primas tres fratziones, de bìndighi minutos ognuna, chi ant fatu registrare su resurtadu de 12-0 pro sos Seahawks, cun tiros piatzados totu trasformados dae su kicker Myers.
Sa prima meta est lòmpida in s’ùrtimu cuartu ebbia. A pustis de una botza intertzetada a su quarterback de sos Patriots Maye sos Seahawks ant conchistadu su possessu e ant mandadu in touch down a Barner.
Sos Patriots ant rispostu cun su touch down de Hollins, ma aterunu tiru piatzadu e ateruna meta, realizada dae Nwosu cun botza furada a Maye (in sa foto), ant incanaladu sa partida. Inùtile s’ùrtima meta de Stevenson cun passàgiu curtzu de Maye. Su resurtadu finale est istadu 29-13.
Sos Seahawks ant bintu cun su giogu de iscuadra e sa regia regulare de su quarterback Darnold.
Su kicker Jason Myers at istabilidu su primadu de marcaduras dae tiru piatzadu in unu Superbowl, cun 5 tiros in mesu de sos palos. Su running back Kenneth Walker de sos Seahawks est istadu premiadu comente mègius giogadore de sa finale.
Est su segundu triunfu, a pustis de su de s’istasione 2013, pro s’iscuadra de Seattle, chi est propiedade de una fundatzione creada dae Paul Allen, cofundadore de sa Microsoft, e chi a pustis chi est mortu est ghiada dae sa sorre Jody. Est istada issa a artziare su trofeu Vince Lombardi, sìmbolu de sa vitòria de su Super Bowl.
Sas duas iscuadras giughiant in s’uniforme de giogu una targa cun su nùmeru 250, pro ammentare s’anniversàriu de s’indipendèntzia americana.
(gianni muroni)
Leave a comment