Sunt essidos a campu sos datos de s’Istat a subra de sa demografia e in Sardigna est unu disacatu. In un’annu ebbia amus pèrdidu belle oto mìgia persones, in deghe annos prus de chentumìgia. Oramai sos chi istant in s’ìsula sunt torrados a unu millione e mesu, cando carchi annu a como aiant barigadu su millione e seschentos. Sa edade mèdia est prus arta de cussa de un’Istadu betzu comente s’Itàlia: barantasete annos sa mesana de italiana, belle chimbant’annos inoghe. Sos chi tenent prus de sessantaghimbe annos sunt su bintoto pro chentu, sos chi nd’ant de mancu de batòrdighi non lompent a su deghe.
Su datu chi assuconat est cussu chi pertocat sa cantidade de nàschidas: seimìgia e batorghentos in sa Sardigna intrea: dae s’annu coladu sunt menguadas de prus o mancu su noe pro chentu. Tenimus s’ìnditze de fecundidade chi est faladu a cunfrontu de s’annu a dae segus: fiat su 0,91% como est su 0,85 pro cada fèmina. Su de s’Itàlia est s’1,14%. Sa diferèntzia intre chie morit e chie naschet est de dòighi mìgia in prus de sos chi si nch’andant: e non cheret nàrrere su dòpiu, ma su triplu. Sas dispedidas, difatis, sunt belle deghennoe mìgia. Carchi persone e nàschidas benit dae fora, sos istràngios chi ant seberadu de bìvere in Sardigna sunt belle chimbantoto mìgia, su 3,72% de sa populatzione.
De 377 comunas sardas bintisès ebbia lompent a deghemìgia abitantes, in su mentres chentutrintatrès tenent prus pagu de milli persones. Sas provìntzias de su nord (Terranoa e Tàtari) aunidas a s’àrea metropolitana de Casteddu acollint belle su sessanta chimbe pro chentu de sos sardos. Sa tzitade prus manna est Casteddu, cun chentu barantasès mìgia de abitantes, ma cun sa zona metropolitana chi bàrigat su mesu millione, segunda est Tàtari cun chentu binti. In ambas duas sa populatzione issoro no est menguada gasi meda.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment