Immàgine leada dae @princeandprincessowales
Sa prima die de martzu sos gallesos afestant a Santu Davide de Menèvia, su patronu issoro. Pro s’ocasione su Prìntzipe de Galles at fatu un’allega pùblica de augùrios in gallesu.
Est su segundu annu chi Gullielmu, erede a su tronu britànnicu, at faeddadu a sos sùdditos de su printzipadu in sa limba natzionale issoro.
Ocannu pro sa prima borta sa pròpiu cosa dd’at fata sa mugere Caderina. Sa printzipessa fiat a bestire ruju, chi ammentaiat su colore natzionale de sa natzione tzèltica. Ambos duos giughiant unu frore de nartzisu in petorras. Su nartzisu, chi in Galles frorit pròpiu sas dies de sa festa, est, dae su de deghennoe sèculos, bènnidu a èssere unu de sos sìmbolos natzionales gallesos.
Su messàgiu, chi sos duos ant lèghidu faghende a borta a borta, naraiat:
«A totus in Galles bona festa de Santu Davide. Su Galles est acanta meda de sos coros nostros e ogna borta non bidimus s’ora de bènnere in bisita. Est unu paisu ermosu cun un’istòria rica e gente meravigiosa. Bos auguramus una die prena de festas cun sas famìllias e sos amigos bostros».
Dd’ant publicadu in sa pàgina Instagram de sos Prìntzipes cun sutatìtulos in inglesu.
Ddo’est dae annos sa rechesta pro fàghere de custa tzelebratzione die de festa, rechesta chi finas a como sas autoridades britànnicas no ant atzetadu, pro resones econòmicas. In ogna modu tzertos ufìtzios pùblicos gallesos serrant su matessi dende sa die lìbera a sos dipendentes.
A Davide, para e pìscamu de su de ses sèculos, est finas dedicadu s’istendardu chi est, si podet nàrrere, sa segunda bandera de su Galles, a pustis de sa cun su dragone ruju in campu biancu e birde.
Est una rughe groga in campu nieddu. Finas si su vessillu at cumintzadu a èssere populare in custu ùrtimu sèculu ebbia, su grogu e su nieddu sunt istados semper cunsiderados, pro traditzione, sos colores de su santu. E grogu est, pro torrare a sos sìmbolos natzionale, su nartzisu chi fiant ingalanidos sos prìntzipes.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment