Un’apuntamentu nou chi no est istadu aprofundimentu culturale ebbia ma finas una manera de festare sos 20 annos de sa revista “Camineras”.
In sa Sala Afriscos de s’Ex Cumbentu de sos Caputzinos de Carrera de Brigata Sassari, ant presentadu su libru “Si ch’ant a furare fintzas custu”, editziones Condaghes 2022. Unu volùmene chi bantat su cuntributu de prus de un’autore, dae Ninni Tedesco a Daniela Piras, dae Federicu Francioni a Pàulu Mugoni; e finas Loredana Rosenkranz, Nello Bruno, Piero Atzori e Pier Giorgio Pinna.
Sa cosa l’ant fata in intro de sa rassinna “Vianconvento”, amaniada dae s’Amministratzione comunale de Cuartu in collaboratzione cun s’Assòtziu “Sa Bertula Antiga”.
“Camineras” la sunt publichende dae su 2002. Cun testos in sardu e in italianu, sa revista est semper impinnada in sa gherra a sos mecanismos de su colonialismu, non de tipu ecònomicu e sotziale ebbia, ma finas polìticu e culturale. Presupostos chi mantenent sa Sardigna in una cunditzione de assugetamentu e de subalternidade.
Sunt intervènnidos, comente relatores, Pàulu Mugoni e Federicu Francioni, redatores de su periòdicu. Est istada un’ocasione de importu pro faeddare de atualidade e finas de su venidore de sa Natzione nostra, marchende puru s’importàntzia de no ispèrdere su patrimòniu mannu rapresentadu dae sa limba sarda.
(redatzione)
Leave a comment