Un’iscumbata de sos canadesos de Citizen Lab, un’istitu de chirca, at iscobiadu chi belle setanta polìticos catalanos sunt istados intertzetados dae non s’ischit chie (ma si podet immaginare chi a dae segus bi podet èssere s’Istadu ispanniolu), cun su programma Pegasus, sestadu dae sa NSO, un’azienda israeliana e cun àteros programma de custa genia.
Su New York Times at faeddadu de s’operatzione de atacos informàticos prus manna e prus documentada de s’istòria, fintzas a oe. Francu sos presidentes e sos polìticos de primore de sa Catalugna, sunt istados oretados fintzas sas ghias de sa ANC, un’istitutzione culturale, e de Òmnium cultural, un’assòtziu pro s’amparu de sa limba.
Su guvernu ispanniolu at denegadu cale si siat responsabilidade in custa chistione, ca pro oretare tzitadinos in s’Istadu si depet pedire su permissu a sos giùdiches cada tres meses, cosa chi no at fatu. Sos assòtzios pro s’amparu de deretos tziviles, comente Amnesty International, ant verificadu sos datos e ant cunfirmadu totu. Como b’at un’impèllida manna a su guvernu ispanniolu, dae polìticos e assòtzios, pro abèrrere un’inchesta indipendente pro iscobèrrere sos responsàbiles.
(redatzione)
Leave a comment