Sos pastores sardos sunt torra prontos a batallare. Custu mangianu in Casteddu, in dae in antis de su Consìgiu regionale, ant manifestadu pro denuntziare totu sas dificultades de su cumpartu.
Aumentu de sas bulletas, de su carburante e de sas matèrias primas, ma peri sas modìficas a sas polìticas agriculas europeas e a su Programma de isvilupu rurale de sa Sardigna sunt sas resones de sa protesta detzisa in s’ìnteri de un’assemblea fata in Tramatza. A parare su fiancu a sos pastores bi fiant sos sìndigos arribados dae totu sa Sardigna e sos rapresentantes de unas cantas fortzas polìticas. Sos rapresentantes de sos pastores ant presentadu a su Consìgiu regionale unu documentu de imbiare a su Ministeru e a sa Commissione europea pro s’agricoltura.
Mariantonietta Piga