Ma a concruos de totu, s’arrennegu contra a sa cultura Woke (ite est custa cosa?) e a sa ditadura de su politicamente curretu (in ue est chi mancat sa possibilidade de faeddare a s’imbesse?) ite est si non sa prepotèntzia de pòdere nàrrere totu su chi regnat in su repertòriu de s’afrenta? S’ùrtima proa nos la dat sa polìtica argentina sestada a motoserra. Javier Milei nos at abituadu in totu custu tempus a su bullismu istitutzionale narende “idiotas”, “descerebrados” e “mogólicos” (cando no “hijos de puta”) a sos crìticos suos. Su malu est chi como unos cantos agetivos los agatamus in s’elencu nou istèrridu dae sa Agencia Nacional de Discapacidad (Andis). Cales sunt custos agetivos? “Idiota” (finas inoghe), “imbécil” e “débil mental”. Impreados sena perunu garbu e sena peruna gràtzias pro sa persones cun disabilidades psìchicas. S’inditu, mancu a lu nàrrere, est lòmpidu dae su guvernu. E mustrat s’impastu ideològicu de custa internatzionale sovranista chi dae Milei in cussos chirros est rapresentada. Sa cosa no est noa, si nd’est faeddende dae carchi mese. S’Andis est dae tando chi aiat comintzadu a torrare a bìdere sas normas ligadas a sas pensiones de invalididade. Sos critèrios impreados in antis sighiant sa cunventzione de s’Onu in contu de diritos de persones cun disabilidade. Pro su guvernu sas màllias fiant tropu largas e inclusivas e nant chi permitiant sa possibilidade de carchi trampa (no est noa comente còntiga). Duncas: su “idiota” est su chi «no ischit ite est su dinare, non controllat sos pertusos suos, no acumprit a sos bisòngios primarios». E gasi sighende·bi·la cun sos «imbetzilles». Una curiosidade: custos sunt sos critèrios chi aiat postu su 1998 su guvernu de su presidente Carlos Menem, un’àteru pegus chi nch’est in su pantheon de Milei. E una cariasedda a concruos. Su mese de nadale de s’annu coladu, Milei at retzidu sa tzitadinàntzia onorària gràtzias a sos giajos de babbu e gràtzias a su guvernu de Giorgia Meloni chi no est lestru meda a la dare a chie (a diferèntzia de s’amigu suo) istat inoghe dae tempus meda.
mauro piredda
immàgine https://www.pexels.com/it-it/@karolina-grabowska/
Leave a comment