S’istiu 2022, a dispetu de sa gana de torrare a biagiare a pustis de duos annos de inserru, est in perìgulu pro neghe de sos isciòperos de sos bolos: petzi in làmpadas bi nd’at àpidu duos, s’8 e su 25. E un’àteru est in programma pro su 17 de trìulas, cando pro 24 oras sos pilotas e sos assistentes de bolu de sas cumpannias aèreas Ryanair, Malta Air e de sa sotziedade CrewLink ant a abarrare a pee in terra.
Unu isciòperu detzisu dae sos sindacados Filt-Cgil e Uiltrasporti, chi denùntziant s’aviu mancadu de unu cunfrontu subra de sos problemas chi dae meses est patinde su personale navigante.
Sos traballadores italianos pedint cuntratos chi garantant cunditziones de traballu dignitosas e istipèndios in lìnia cun su mìnimu salariale prevìdidu dae sos cuntratos natzionales de su trasportu aèreu in Itàlia, gasi comente prescrivet sa lege.
Sas protestas sunt faghende peleare miliones de turistas in biàgiu: in totu Europa b’at bolos in ritardu o cantzellados pro sos isciòperos, ma peri ca mancant sos traballadores, minimados in tempus de pandemia.
Est de oe sa noa de s’acordu mancadu intre sa cumpannia iscandìnava SAS e sos pilotas, chi in custas dies at a custrìnghere belle milli dipendentes in Danimarca, Isvètzia e Norvègia a iscioperare, lassende a pee in terra onni die belle 30 mìgia passegeros.
Pro s’isciòperu italianu de su 17 de trìulas, a chie at giai una prenotatzione, su presidente de s’Unione Natzionale Consumidores, Massimiliano Dona, ammentat chi ant diritu a s’assistèntzia, a su rimbursu e a una cumpensatzione pecuniària si non sunt istados informados de su bolu cantzelladu a su mancu duas chidas prima.
Mariantonietta Piga