Si narat chi s’istòria a bortas torrat comente una brulla, e cust’istòria de sos documentos segretos americanos paret pròpiu gosi. Non b’at 007 perunu, nen carchi persone abbista chi faghet su giogu dòpiu cun carchi traste tecnològicu. Chie at furadu, fotografadu e publicadu totu cantu est Jack Teixeira, unu sordadu giòvanu de bintunu annos serente a sa dereta estrema, amantiosu de sas armas, de sos video giogos e chi aiat gana de fàghere unu pagu de pàgia cun sos amigos suos. Fiat gasi craru chi fiat isse, chi l’aiant iscobertu fintzas sas televisiones e cando s’esèrtzitu americanu est andadu a l’arrestare, b’aiant giai sas televisiones prontas in fora de domo sua.
Ma ite b’at in sas pàginas essidas a campu? Pro su prus faeddant de sa gherra in Ucraina. Contant de sas dificultades de s’esèrtzitu ucrainu a si difèndere dae sos atacos russos cun sos mìssiles, ma fintzas de comente, a die de oe, s’Ucraina non tenent sas fortzas pro si torrare a leare su terrinu conchistadu dae Putin. Custu però non cheret nàrrere meda: sos USA, a s’inghitzu de sa gherra, pensaiant chi Zelensky e su Paisu suo si diant àere rèndidos in pagas dies. A sa matessi manera sas noas chi faeddant de unu disafiu intre Prigozhin, su mere de su grupu Wagner, e Shoigu, su ministru de sa Defensa russu, non parent cosa noa e non cherent nàrrere nemmancu chi s’ant a ochire a pare in pagu tempus.
Sos documentos sunt anàlisi de su chi est capitende como e de comente podet andare a dae in antis sa situatzione, de sas istrategias impitas dae s’Ucraina e dae Putin e dae sos òmines suos. No est chi sunt iscobiaduras de su benidore. Su chi est essidu a fora de birgongiosu sunt sas timorias e sos acordos cuados de carchi Istadu, sa cantidade de agiudu chi sos americanos e àteros Istados sunt dende o non dende a s’Ucraina, sa connoschèntzia funguda de sos USA de su chi est capitende in sa gherra e de su chi càpitat de a beru intre sos alleados.
Gabriele Tanda
Leave a comment