Nemmancu intrados in vigèntzia e sos dàtzios istadunidensos ant firmadu su mercadu a isteddos e tira de sos alcòlicos europeos. Su problema est chi sos distribudores americanos non sunt comporende sos produtos nostros ca sunt timende chi, pro neghe de sas tassas de su 200% minetzadas dae Trump, sas ampullas ant a abarrare in sas butegas. Su problema est chi sunt cantzellende fintzas sos cumandos giai fatos in sos meses colados e, pro custa resone, càssias maicantas sunt firmas in sos portos e in sos magasinos. Sa situatzione naschet como ca sa medida trumpiana diat dèvere intrare su 2 de abrile. Sos nàvios, ca su binu biàgiat in mare, no ant a suprire a dae in antis de sa meidade de su mese imbeniente.
Sos dàtzios sunt tassas chi depent pagare sos americanos chi ant a agatare unu binu sardu, chi a su sòlitu costaiat deghe dollaros, a trinta. In su mentres, sos binos tzilenos, argentinos o de àteros tretos de su mundu, sighint a costare deghe. S’arriscu tando est chi su cliente s’at a istesiare dae sos produtos europeos pro si afitianare a àteros. Tando, su perìgulu no est petzi pro custos meses, ma podet giùghere cunseguèntzias de tempus prus longu. Su pidinu est mannu in totu su setore ca, petzi in Itàlia, sas esportatziones USA balent prus o mancu duos milliardos de èuros, pro su prus balangiados cun binos de prètziu bàsciu.
Sos dàtzios sunt una cunseguèntzia de sa gherra econòmica de Trump contra a sos alleados betzos de sos USA. At incumintzadu isse tassende s’atàrgiu europeu chi intraiat in su Paisu suo; at rispostu s’UE, minetzende una medida contra a sos produtos americanos, mescamente contra a sa soia, sa petza e sos eletrodomèsticos pro s’inghitzu de abrile; at torradu a si mòere Trump contra a sos alcòlicos.
Su chi est craru est chi custu abbolotu at a corfare totu cantos, ma mescamente sas aziendas minores chi dae cussas intradas podiant sighire a bìvere.
Gabriele Tanda
Leave a comment