Sos Carabineris de su Nucleu Investigativu de su Cumandu Provintziale de Nùgoro sunt indaghende pro iscobèrrere chie l’at mortu a Luca Virde, 42 annos, de Silanus, eris sero, in un’impostada, a ora de sas 10 in Nùgoro, in su bighinadu de Badu ’e carros.
Fiat recuende a domo sua, Virde, cando, in pessu faladu dae sa vetura, l’ant isparadu a palletones. Sos residentes, assustados, ant mutidu deretu su 112. A su logu sunt supridos sos Carabineris, su 118, sos pompièris, su magistradu de turnu e su dutore legale.
Sos militares ant deretu postu làcana a su tretu de s’impostada a manera de pòdere fàghere sos rilievos e collire elementos de profetu; ant peri achiridu sas màgines de sas telecàmeras de sorvegliàntzia presentes.
Luca Virde fiat in libertade vigilada, fiat iscontende una cundenna pro omitzìdiu volontàriu a 15 annos e 9 meses: su 15 de trìulas de su 2013, in una festa in Silanus, aiat istocadu e mortu a unu paesanu suo, Antonello Arca de 36 annos, fuende·si deretu pro si cunsignare a sa Cuestura de Nùgoro pustis de una chida. Est su de tres omitzìdios in su giru de unu mese e mesu in sa provìntzia betza de Nùgoro: su 13 de ghennàrgiu in Gàiro ant mortu a Riccardo Muceli, allevadore de 38 annos; in Ulìana, su 20 de ghennàrgiu ant mortu a Tonino Corrias, allevadore de 59 annos.
Mariantonietta Piga