Sa Corte de sos Contos no at agatadu peruna faddina in sos gastos de sas eletziones sardas, andende contra a su parre chi at bogadu a campu su Cullègiu de garantzia eletorale de sa Sardigna e chi aiat suspèndidu sa Presidente Todde. Como chi sa minetza de torrare a su votu paret a curtzu unu pagu de mancu, Todde est renèssida a fàghere colare s’annoada de sa chima de sanidade sarda e gasi, dae su 12, sa Giunta Todde at 45 dies pro fàghere sas nùmenas suas.
Sa sanidade est unu setore de importu pro sa polìtica, non petzi pro sa salude de sos tzitadinos, ma mescamente ca est cussu in ue girat prus dinari e in ue traballat prus gente. Cambiare sos diretores de sas ASL e de sas Aziendas sanitària ligadas a sas universidades est unu sinnale de fortza e de seguresa noa.
Galu non s’ischit de tzertu chi at a èssere bogadu e chie at a abarrare, ma carchi nùmene inghitzat a s’intèndere. Paolo Cannas, diretore generale de s’ASL 3 de Nùgoro, Angelo Maria Serusi, diretore de s’ASL 5 de Aristanis, Andrea Marras, diretore de s’ASL 4 de s’Ogiastra e Giorgio Carboni diretore de s’ASL 6 de su Campidanu de mesu parent chi siant agradèssidos e ant probabilidades medas de mantènnere su logu issoro.
A s’imbesse sos àteros chi sunt istados numenados dae sos partidos de sa majoria betza, comente Simonetta Cinzia Bettelini, posta a ghia de s’Areus dae sa Lega, ant a èssere cambiados cun persones noas. Sighende custu surcu ant a cambiare gestione logos de importu che a sas duas Aziendas Ospidalieras Universitàrias, ma fintzas sas ASL de Tàtari, de Casteddu, de Terranoa e de su Brotzu.
Comente càpitat a s’ispissu in custos abbolotos, però, in pagos ant a pèrdere sa positzione e su traballu, ca s’arriscu est cussu de ricursos e de chertos in sos tribunales. Chie at a essire, l’at a fàghere, ma non de su totu, l’ant a istesiare ebbia.
Gabriele Tanda
Leave a comment