S’atacu israeloamericanu a s’Iran arriscat de si nch’ispainare a totu s’àrea mediorientale. Giai sos paisos de sa penìsula aràbica, chi est, de facto, una piataforma militare pro sos Istados Unidos, ant tentu dannos pro sos bombardamentos iranianos.
Ma su cunflitu si diat pòdere allargare finas a setentrione. S’Azerbaigiàn pro como s’est mantènnidu neutrale, ma custu est unu fronte chi si diat pòdere abèrrere e chi diat destabilizare galu de prus s’Iran.
Difatis su presidente azeru Ilham Aliyev at acusadu s’Iran de àere mandadu drones a atacare s’exclave de su Nakhchivan, oe 5 de martzu.
«Sas fortzas Armadas nostras ant retzidu istrutziones pro aprontare e pònnere in pràtica sas medidas de ritorsione chi ddoe cherent», at decraradu.
Sos iranianos, dae parte issoro, imputant s’atacu a Israele, chi in custu modu diat èssere chirchende de nche tirare s’istadu a làcana a intro de sa gherra.
S’Azerbaigiàn, a livellu internatzionale, a prus de un’alleàntzia istòrica cun sa Turchia, tenent relatziones bonas cun s’istadu giudàicu, chi ddu cunsìderat un’alleadu de fidare in s’àrea.
Sos azeros rapresentant su segundu grupu ètnicu de sa Repùblica Islàmica de s’Iran. Sunt unu 15% de sa populatzione, mentras sos persianos sunt pagu prus a mancu su 65%. Custu cheret nàrrere in tèrmines numèricos assolutos chi sunt prus sos azeros de s’Iran chi non sos de s’Azerbaigiàn.
Custa gente, chi apartenet a su grupu linguìsticu turcu, est integrada a intro de sas làcanas iranianas a livellu sotziale e polìticu.
Azeru fiat pro nàrrere Alì Khamenei (in sa foto), sa Ghia Suprema de s’Iran, mortu su 28 de freàrgiu a suta de sas bombas israelianas. Azera, a su chirru de su babbu, est finas Farah Diba, sa viuda de su Scià Rezah Pahlavi.
Custu intzidente duncas diat pòdere rapresentare unu casus belli chi diat pòdere ispìnghere s’Azerbaigiàn contra a su bighinu persianu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment