Sos aneddos de Saturnu bidos dae sa sonda Cassini

         – de Sarvadore Serra –

Sa sonda Cassini de sa NASA at imbiadu fotografias noas  chi mustrant, pròpiu dae curtzu, sos aneddos lughentes  de sas pedras astradas de  Saturnu. “Custas vistas probianas rapresentant s’abertura  de una ventana noa  a  sos aneddos de custu pianeta”, at naradu Matthew Tiscareno, unu de sos istudiosos  chi traballant  in s’Istitutu SETI, (Mountain View,Califòrnia), chi est sighende su progetu.

“E, in sos meses chi benint, isperamus de retzire datos chi nos pòngiant galu de prus in birbìlliu”, at agiuntu Tiscareno.

Lantzada in su mese de santugaine de su 1997, Cassini est istada sa prima sonda  chi at orbitadu a fùrriu a Saturnu. Sos dispositivos suos ant fotogratadu comente non mai custu pianeta ispetaculare, sos aneddos suos mannos, sas lunas Titanu e Encelado, in ue bi podet èssere sa vida , e ant fintzas iscobertu satèlites naturales in formatzione. Como, a belle  20 annos dae cando est mòvida dae sa Terra, Cassini s’agatat in sa penùltima fase de vida. Intro de su  2017 at a agabbare sa missione sua ghetendeˑsi  in s’atmosfera de su pianeta.

Sas figuras captadas dae Cassini ant permissu a sos istudiosos de  osservare  particulares minores a beru  de sos aneddos, comente sa  “pàgia” e sas  “èlicas” —causadas, in manera rispetiva, dae partìculas de aneddu aglutinantes e lunetas minores incassadas.

Segundu sas previsiones de sa NASA, su  15 de cabudanni de su 2017 Cassini at a intrare in s’atmosfera de Saturnu e a s’at a disintegrare comente unu meteorite pro more de sa fritzione cun s’àera. Una de sas finalidades  de custu suitzìdiu controlladu est evitare de luare sos lagos de Titanu o sos mares de Encelado, in ue sa sonda at iscobertu geiser, cun mìcrobos terrestres chi diant pòdere èssere supravìvidos in sa  sonda.

Ligàmenes:

https://www.youtube.com/watch?v=6zc5XhITDzE

http://elpais.com/elpais/2017/01/31/ciencia/1485901007_502526.html

Leave a comment