Su guvernu est in bidea de cambiare sa polìtica a subra de sos cartzerados a suta de su 41-bis: su progetu est de los pònnere in sete presones ebbia, e su sutasegretàriu Del Mastro at fatu cumprèndere chi, de custas, tres ant a èssere in Sardigna. Bisòngiat de ammentare chi sos cundennados a su regime cartzeràriu de su 41-bis sunt persones pro sa majoria ligadas a sas organizatziones mafiosas, ma fintzas a su terrorismu. Sos nùmenes de sas istruturas sardas sunt giai essidos a campu: Uta, Bancali e Badu ‘e Carros. In sa proposta de s’incumintzu sos nùmeros fiant puru prus minores: 192 detenudos. Como sunt crèschidos a 240.
In Sardigna sos murrùngios sunt maicantos e sa timoria est semper sa matessi pro totu cantos. Cun sos presoneris ant a suprire a Sardigna sas famìllia issoro, cun soddos meda de gastare e su poderiu de sa violèntzia. Còmpora de sas butegas, de sas osteras e de àteras istruturas de primore pro sabunare su dinari brutu, fàghere traballare sos afiliados e cuare su tràfigu de sa droga. S’impreu de sa minetza pro fàghere bìnchere o seberare sas aziendas ligadas a sas coscas, lassende a banda cussas onestas e raighinadas in su territòriu.
Sos sindacados de sa politzia si sunt chescende cun su Ministèriu ca est dae annos chi s’Itàlia est menguende su nùmeru de sos agentes, de casermas e de àteros logos ligados a s’òrdine pùblicu in s’ìsula. Cun sa lòmpida de custos criminales — narat su SIULP — b’at de tìmere chi sa criminalidade mafiosa potzat ismanniare meda sa presèntzia sua inoghe.
Sos amministradores sardos sunt proende a tèssere una retza contra a su progetu. Sa Presidente Todde at denuntziadu sa mòvida de su guvernu chi est andende a dae in antis sena nàrrere nudda a sa Regione, mutende a sos sardos pro una movitia ispartzinada contra a su progetu. Su sìndigu de Tàtari, Mascia, at giai decraradu sa presèntzia e s’impinnu suo.
Gabriele Tanda
Leave a comment