Eris su 20 de martzu sa Camera de sos Deputados at votadu una motzione a subra de sas presones italianas: sa riunione cunvocada a manera urgente serbiat pro faeddare sas medidas pro firmare sa crèschida de sos suitzìdios in ie. Su guvernu fiat, pro su prus, ausente e sas duas propostas de sas opositziones, chi proaiant a fàghere essire calicunu (mescamente chie est isetende su protzessu, o chi est bajulende una cundenna pro crìmines minore) sunt istadas botzadas e, a s’imbesse, est colada sa de su guvernu.
Sa situatzione de sas presones italianas, difatis, est istada cundennada prus de una borta dae sas istitutziones europeas, ca est contra a sos deretos umanos. E sos nùmeros dant resone a s’Europa. In su 2024 s’est barigadu su record de sos suitzìdios: 90 in un annu, ma sas proas sunt istadas 2.035. A lu nàrrere est sa relata de su Garante natzionale de sos detenudos (incarca inoghe pro lu lèghere), chi fràigat unu ligàmene craru intre sa cantidade de sos detenudos de sas tzellas e sos chi sunt mortos: in 51 de sos 54 càrtzeres in ue est capitadu unu suitzìdiu b’aiat sovrapopulamentu. Su 2025 s’est abertu cun 20 suitzìdios, una cantidade chi assuconat, ca si sighit gasi at a barigare fintzas su record de s’annu coladu.
Cale sunt sas resones de custa disacatu? A craru non s’ischit, ma sighende su chi at iscritu su Garante, sa responsabilidade podet istare in sa crèschida de sos detenudos pro neghe de sas lìnea prus tètera de su guvernu in contu de droga lèbias e de àteras chistiones minores. Su sovrapopolamentu est capitende fintzas in sas presones minoriles, fatu a su decretu Caivano. Ma b’intrat fintzas su pagu personale, sos pagos progetos de traballu a fora de sas tzellas e sos tempos longos de sa giustìtzia italiana (su 46% de sos chi si ochint, non sunt istados nemmancu cundennados).
Sa motzione colada eris, sa 1/00418 (incarca inoghe pro lu lèghere), promitet de fraigare àteras presones; de ismanniare su nùmeru e s’istipèndiu de sas bàrdias e de pònnere prus aficu a sos progetos de traballu e de istùdiu in càrtzere. Su problema est chi sunt paràulas sena dinari, medidas cun tempos longos. In su mentres sa gente sighit a mòrrere in su disisperu prus nieddu.
Gabriele Tanda
Leave a comment