Est essida a campu sa relata de su Sole 24Ore a subra de su tempus in Itàlia (incarca inoghe pro la lèghere). Sos datos sunt istados incungiados dae 3bmeteo una sotziedade de su grupu Meteosolution chi traballat cun sos datos e sas previsiones metereològicas. Sa classìfica sighit 15 genias de datos e dae custos faghet una classìfica de sas tzitades cun su clima prus bonu: 107 logos e s’ùrtimu est Carbònia, a su revessu de sos àteros cabu-logos sardos chi sunt postos mègius. S’ischit chi sa tzitade minerària chèrfida dae Mussolini est istada fraigada in unu logu chi sos isulanos àntigos no aiant mai seberadu, ca tropu malu e caente preferende sos montìgros a inghìriu, e sos datos torrant a lu cunfirmare.
Sa relata non faghet una fotografia de s’oe ebbia, ma tenet un’istòricu chi analizat sos ùrtimos deghe annos. In custa manera si podent cumprèndere sa mannària de su cambiamentu climàticu in sos logos minores e s’andanta sua. Custu ca, francu sos datos simpres (cantas dies de sole, de bentu e de abba), b’at fintzas sas temperaduras e sas acontèssidas estremas. Sa cantidade manna de datos dat sa possibilidade a sos curiosos de compidare e chircare cale ischera de fenòmenos est creschènde e cale, a s’imbesse, in una tzitade est menguende.
Si belle in totue sa temperadura mesana est crèschida, non l’at fatu in sa matessi manera: in Aristanis de 1,9°, in Nùgoro de 0,6°. Ammentamus chi semus faeddende a cunfrontu de deghe annos a dae in antis ebbia. Sas notes tropicales sunt su fenòmenu prus ismanniadu, cun chimas de su 43,7% in Carbònia, francu in Nùgoro in ue sunt menguadas de su 15%. Sas chi sunt minimende sunt sas dies fritas a suta de 3°: in ue fiant raras, sunt iscumparende, in ue abarraiant fortes sunt divènnidas raras.
Unu traballu cumplessu e fungudu, chi donat datos istòricos e chi faghet bìdere cun mapas, gràficos e àteros traste unu caminu chi a lenu a lenu est andende a dae in antis fintzas in s’ìsula nostra.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment