Eris sero in s’istàdiu de Palermo sa seletzione italiana est istada bìnchida dae sa natzionale de sa Matzedònia de su nord pro una rete de Trajkovski a su minutu norantaduos. Pro sa segunda borta de sighidu s’Itàlia abarrat a fora de sos mundiales de fùbalu: in su 2018 aiat brincadu sos de sa Rùssia, e como sos de su Qatar de s’istiu imbeniente.
Sos campiones de s’Europa non sunt resèssidos a barigare un’iscuadra chi s’est tancada in defensa e chi non los at lassados giogare comente cheriant issos. Sa neghe però est istada totu de s’iscuadra italiana chi est pàrfida istudada in prus de unu setore: mescamente sa defensa, pagu abbista in su momentu de sa rete, e is atacantes pagu pretzisos in sos tiros.
A pustis de custa partida s’Itàlia non podet andare a su mundiale in Qatar, un’eventu acumpangiadu dae cuntierras mannas ca su Paisu non rispetat sos deretos umanos e ca at fraigadu sos istàdios in ue s’ant a giogare sas partidas isfrutende sos traballadores chi, difatis, sunt mortos in prus de ses mìgia.
(redatzione)
Leave a comment