S’ispantu de sa perca de Su Màrmuri in Ulassai

                                de Salvatore Serra

Sa perca de Su Màrmuri in Ulassai  est una de sas prus mannas  de Europa gràtzias a su chilòmetru de longària e a un’artària mèdia de  35 metros.

Cando si falant sas 200 istradeddas  de s’isprofundada de su cumintzu, sa bìsita s’isvilupat in un’àndela còmoda in su paris chi nche colat una sèrie sena agabbu de bratzitas de birada chi a s’ispissu formant lagheddos in longu de sa pinna a manu dereta. Sunt particulares a beru sas tantas  cuncretziones, chi sas dimensiones issoro sunt proportzionadas  a sa de s’ambiente. Ispantat s’imponèntzia de unos cantos grupos istalagmìticos e de sas coladas ricas de festones chi pendent dae sas mesigheddas  de sas pinnas.

Sa cavidade de sa perca est istuvada in su Tacu de  Ulassai, su massissu calcàreu chi dòminat sa bidda: s’intrada s’aberit in una falada percossosa in ue si podet colare cun fatzilidade  gràtzias a un’iscalinada de  200 istradeddas. Su Màrmuri est una perca galu bia: custu cheret nàrrere chi sas cuncretziones  sighint a si formare. In sos caminamentos si colat cun àsiu e si podent ammirare iscenografias galanas: duos lagheddos suterràneos, formados dae s’istiddiòngiu pèrpere, bratzitas, istalatites,   istalagmites mannas-mannas, colunnas, pisolitos, splash (formas globulares ingendradas dae s’istiddiòngiu) e àteras cuncretziones caltzìticas ispetaculares. B’at salones imponentes  ricos de cuncretziones e cun bòvedas artas-artas.
S’ambiente prus mannu est sa  Grandu Sala: tenet una forma retangulare, est longa 72 metros e lada 30 metros. In sa  Sala de s’Òrganu sas cuncretziones  s’assimìgiant a sas cannas de un’òrganu. Sa Sala de su Cactus est caraterizada dae sa  presèntzia de duas istalagmites artas chi ammentant sas  prantas grassas esòticas famadas.

Sas àteras salas sunt: sa Sala de sos Impeddones, sa  Galleria de sas  Bratzitas e sa Sala Terminale. Sa temperadura interna est semper, pagu prus o mancu,   de  10 grados.