Est giòvanu, musulmanu e fìgiu de immigrados, su polìticu chi at leadu su rolu de primu ministru iscotzesu dae Nicola Sturgeon. Sa die a dae in antis su SNP (Scottish National Party) l’at votadu comente ghia de su partidu prus mannu e de importu de s’Iscòtzia.
Humza Yousaf tenet trintasete annos, est nàschidu in Glasgow dae babbu pachistanu e mama kenyota, de aredeu indianu e pro custu persighida e fuida dae su Paisu africanu. Una famìllia chi est musulmana e chi s’est integrada bene meda in una sotziedade aberta e chi acollit sos istràngios chi nd’ant bisòngiu. Yousaf at istudiadu e at inghitzadu a fàghere polìtica in su partidu indipendentista ca in ie at agatadu unu progressismu diferente dae su de sos laburistas inglesos.
Intradu in su Parlamentu iscotzesu, at giuradu in inglesu e in hurdu, sa limba pachistana sua e de sa famìllia sua. In s’atividade polìtica at firmadu leges de amparu dae sos crìmines de òdiu, fintzas contra sos omosessuales.
Yousaf, comente prima cosa posca de àere leadu su rolu, at intregadu sa rechesta a Londra pro otènnere prus poderiu pro su Parlamentu iscotzesu, in bidea de ammanigiare torra su referendum pro s’indipendèntzia. Sas decraradas chi at lassadu fintzas a como, acrarint chi cheret sighire su surcu de Sturgeon in una polìtica progressista e chi punnat a s’egualidade de sos tzitadinos.
Sa situatzione est curiosa: como siat s’Iscòtzia, siat su Rennu Aunidu sunt ghiados dae fìgios de immigrados. Sunak, su primu ministru inglesu (nd’amus faeddadu inoghe), però est su frutu de famìllias privilegiadas, impreadas pro guvernare sos àteros pòpulos a suta de s’imperu inglesu; Yousaf, de erèntzia traballadora, at un’identidade sua, no est un’iscotzesu folclorìsticu, ma, a su matessi tempus, at unu ligàmene forte cun s’idea de indipendèntzia e de progressismu.
(redatzione)
Leave a comment