Su càmbiu de regime in Sìria non paret, pro como, chi siat batende novas bonas pro sas minorias religiosas.
Su guvernu de Al Golani est promitende su rispetu de totu sas cunfessiones e de totu sas fides ma s’impressione est chi s’esecutivu de s’ex militante de su grupu estremista islàmicu Hyat Tahrir Al Sham siat a bellu a bellu faghende de s’istadu mediorientale unu logu dominadu dae sa versione prus integralista de s’Islam sunnita.
Giai sos alauitas ant protestadu contra a atacos a fideles e logos sagrados de sa religione issoro. Est, custu, su grupu religiosu chi apartenet sa famìllia Assad. Nàschidu dae s’Islam sciita, tenet elementos esotèricos e calicunu leadu dae su cristianèsimu chi lu faghent cunsiderare dae su prus de sos musulmanos un’eresia.
A tìmere però sunt finas sos cristianos. A espressare custu sentimentu, intre sos àteros, est s’archipìscamu sirocatòlicu de Homs mussegnor Jaques Mourad. In su 2015 nche dd’aiat furadu s’Isis ma fiat resurtadu a pustis de carchi mese a si nche fuire.
In prus su pàrracu de sa crèsia de Santu Frantziscu de Alepo, padre Bahjat Karacach, in un’interventu publicadu dae s’agentzia catòlica Asianews, at contadu una situatzione prus realìstica de sa chi chi essit a pìgiu dae s’imprenta ufitziale e dae sas decraratzione de sos diplomàticos otzidentales. Est beru chi ddo’at prus libertade de espressione de in antis e chi sa situatzione econòmica est aizu megiorada, ma ddo’at àteras cosas puru chi non faghent abarrare trancuillos.
Pro nàrrere, pro intrare in sas fortzas de politzia tocat a connòschere sa sharia, sa lege islàmica, cosa custa in cuntrastu cun cudda laitzidade chi fiat garantida dae Assad.
Sena contare chi grupos armados ponent sos òmines a unu chirru e sas fèminas a s’àteru in sos postales e ant cumintzadu a distribuire burqas in sas carreras, semper in sas paràulas de padre Karacach.
(gianni muroni)
Leave a comment