Foto leada dae @PressTv
S’Iran at naradu chi nono a sa proposta de tratativas pro firmare sas ostilidades bènnida dae sos americanos. Sa mobilitatzione militare polìtica e mediàtica de s’istadu persianu est a su livellu màssimu.
In unu comunicadu ufitziale de su 23 de martzu su Cussìgiu de Difesa at decraradu ca «ogna tentativu de s’inimigu de avantzare in sas costas o ìsulas iranianas at a giùghere, cunforma a sa protzedura militare sòlita, a minare cun diferentes genias de minas navales totu sos puntos de intrada e lìnias de comunicatzione in su Golfu Pèrsicu e in sas costas».
In custu modu totu su Golfu diat èssere blocadu che a s’Istrintu de Hormuz.
In prus su presidente Pezeshkian ant decraradu ca «oe semus biende chi pòpulos de paisos meda de su mudu si nde sunt torrende a ischidare. Sos pòpulos de Pakistan, Turchia, Iraq e Lìbanu sunt manifestende a boghe manna sa contrariedade issoro a Istados Unidos, Israele e a sos crìmines issoro. Sos coros de sos pòpulos lìberos de su mundu non sunt cun sos sionistas».
In su mentras est arribada una nòmina ufitziale chi nche bogat sa nova tzirculada sas dies colada chi Hossein Dehghan fiat su Segretàriu de su Cussìgiu Supremu de Seguresa natzionale, in sostitutzione de Larijani.
Su Segretàriu nou, narat PressTv, su canale informativu in inglesu de propiedade de s’ente radiotelevisivu pùblicu iranianu, est Mohammad Baqer Zolghadr (in sa foto).
Nàschidu in su 1954, Zolghadr at partetzipadu a sa rivolutzione islàmica e a sa gherra cun s’Iraq, militende in su Basij, sa milìtzia paramilitare creada dae Khomeini, e in sos pasdaran.
Tenet una làurea triennale in economia e unu master in amministratzione pùblica. In prus tenet unu dotoradu in management istratègicu.
Su curriculum de Zolghadr, non diferente meda dae su de Daghnegh, dimustrat duncas chi s’Iran non tenet peruna intentzione de tzèdere.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment