Dae carchi die non s’ischiat galu de su totu si sos israelianos fiant faghende atacos minores e torrende a sas lìnias de su fronte, o si a s’imbesse fiant intrende a sa tira de Gaza pro b’abarrare. Como s’est cumpresu chi est incumintzada s’ocupatzione de su terrinu e chi sa punna est cussa de incordonare sa tzitade e de la pònnere suta assìtiu, pro fàghere consumire su màndigu e s’energia de sas gallerias in ue sos militantes de Hamas sunt imbertos.
In su mentres però Israele est bombardende totu sa tira de Gaza, ochende tziviles de onni genia, fintzas pitzinneddos minores chi nudda b’intrant in custa briga. Sos nùmeros de sos mortos chi decrarat Hamas ammisturant realidade e propaganda: sa cantidade pretzisa non si connoschet, ma su chi s’ischit est chi est manna. E non podet èssere de mancu, ca oramai cussu tretu de mundu est tancadu, sena eletritzidade e non bi podet intrare nudda, si non pagos agiudos comente meighinas, màndigu e abba. E sas bombas falant a fitianu.
Fintzas sas organizatziones internatzionales si sunt chesciende de custu disacatu, chi bàrigat sas règulas de su chi si podet fàghere in gherra. Sas pratzas de su mundu puru si sunt prenadas de manifestatziones pro sos palestinesos e pro sa paghe. Totu sunt denuntziende chi s’ispreu non si sanat cun s’arrore. S’ochidòrgiu malèsigu de Hamas non si sabunat cun su sàmbene de criaduras innotzentes.
(redatzione)
Leave a comment