S'insularidade in sa Costitutzione italiana

Est colada in su Senadu s’isularidade in sa Costitutzione. Como sa Repùblica at reconnotu chi semus un’ìsula cun sos piessignos nostros e chi amus bisòngiu de un’agiudu in prus pro andare a dae in antis. Sas reatziones sunt istadas diferentes: chie at festadu e chie nono. Sos primos pensant chi sa lege podet batire in s’ìsula su dinari pro fraigare su chi nos fartat in sas istruturas e pro ammanigiare mègius sos trasportos. Sos àteros pensant chi est una manera noa pro istare in suta, pro nos pensare minores e bisongiosos, ma fintzas una manera pro ligare sa polìtica sarda a su chi cheret fàghere sa polìtica italiana in s’ìsula nostra.

Su chi si est seberadu est una fòrmula prus dèbile de cussa seberada a s’inghitzu. Difatis sa proposta de s’incumintzu fiat su reconnoschimentu de «il grave e permanente svantaggio naturale derivante dall’insularità» e «le misure necessarie a garantire un’effettiva parità e un reale godimento dei diritti individuali e inalienabili». Su chi si est reconnotu sunt sas «peculiarità» de sas ìsulas: non b’at isvantàgiu perunu, ma piessignos ebbia. E sas medidas non sunt prus «necessarie», ma sas medidas sunt fatas pro promòvere su chi b’est in sas ìsulas, non b’at diferèntzias de deretos intre sos sardos e sos italianos.

Su chi paret tando est chi sa Repùblica chèrgiat promòvere su chi b’at in Sardigna, dende·li un’agiudu pro fàghere mègius, ma sena si leare òbligu perunu: un’impinnu, una promissa iscrita. Bisòngiat fintzas nàrrere chi sos acordos Istadu-Regione in s’istòria serente non nos ant favoridu meda, bastat de si ammentare sa cuntierra famada comente “vertenza entrate”. Tando isetamus a festare e bidimus chi tenet resone: petzi su tempus nos lu podet iscobiare.

(redatzione)