Sa situatzione internatzionale in unu mese est cambiada meda e unu rolu nou l’at conchistadu s’òmine prus ricu de su mundu, Elon Musk mere de Tesla, s’indùstria de veturas elètricas, Starlink, sa retza privada de satèlites e SpaceX, s’azienda ispatziale privada chi at comente punna sa de lòmpere a Marte in pagos annos. Isse est su DOGE, sa ghia de su Dipartimentu pro atoliare su traballu pùblicu, de su guvernu Trump, cun in prus sa crara influèntzia in sos sèberos de su Presidente.
Sas atividades de Musk non si sunt arressende a sos Istados Unidos, ma sunt andende a isfrutare su rolu in su guvernu pro balangiare mercados noos a sas indùstrias suas, impitende fintzas sa minetza de sa fortza istadunidensa. Est su chi est capitende In Itàlia in contu de defensa informàtica.
S’Istadu nostru est dèbile dae s’ala de su controllu dae sos atacos chi benint dae sa retza, mescamente dae sa Rùssia. Sa sanidade, sas bancas, sos ufìtzios pùblicos e sos Ministèrios, totu cantos in custos annos de gherra in Ucraina ant àpidu furòngiu de datos de importu. Sa neghe est istada de sa paga cultura informàtica de funtzionàrios meda, ma fintzas de unu sistema chi no est fraigadu cara a sos problemas de oe.
Pro sòrvere sa chistione su guvernu Meloni at agatadu tres sèmidas possìbiles: dare totu cantu in sas manos de Starlink, e tando de Musk, finamentas sos datos dìligos de s’esèrtzitu e de cada tzitadinu de s’Istadu; pònnere carchi làcana a su controllu de Musk; o a s’imbesse dare sa gestione a àteras sotziedades ligadas a àteros Paisos europeos, comente sa Frantza.
Sa dibata però est istada, fintzas dae s’inghitzu, influentzada dae Musk e dae su referente suo in Itàlia, Andrea Stroppa. Isse at istugiadu in sos social network sa Meloni pro non si pinnigare a sas rechestas de Mattarella o de àteras istitutziones, e cando essiant in s’imprenta carchi duda de sa Presidente de su Cussìgiu, isse si chesciaiat e at proadu a pesare s’annicu de sos sighidores suos.
Sa lege como est colada e paret galu aberta a unu controllu istitutzionale, ma “all’italiana”: paga craresa e cun sa possibilidade de èssere interpretada.
Gabriele Tanda
Leave a comment