-de Sarvadore Serra –
5 annos a como, a pustis de unu referendum coladu cun su 98,83% de sos votos, su Sudàn de su Sud s’est fatu indipendente. Su presidente de su Parlamentu sudsudanesu, James Wani Igga, at decraradu in manera ufitziale s’indipendèntzia de sa Repùblica de su Sudàn de su Sud, s’ùrtimu passu istabilidu dae s’acordu de paghe de su 2005 chi at fatu agabbare sa gherra tzivile longa intre su nord e su sud de su Sudàn.
“Nois, sos rapresentantes elèghidos in manera democràtica dae su pòpulu, decraramus chi su Sudàn de su Sud est un’Istadu indipendente e soveranu “, at naradu Igga leghende sa decraratzione formale de indipendèntzia in Juba, sa capitale.
Deghinas de mìgias de sudsudanesos ant balladu e cantadu dae mesunote de chenàbura pro festare sas primas oras de vida de s’Istadu nou. In unu primu mamentu, sas fortzas de seguràntzia ant proadu a mantènnere su controllu in sas carreras, ma deretu si sunt retiradas , in s’ìnteri chi sa gente fiat faghende bentulare cun alligria sa bandera natzionale noa (niedda, ruja e birde).
Una truma manna de pessones si sunt reunidas in su logu in ue ant tzelebradu sa tzerimònia de s’indipendèntzia, chi b’ant assìstidu dignitàrios istràngios medas, e in mesu de custos su presidente de su Sudàn, Omar Hassan al Bashir, su segretàriu generale de s’ ONU, Ban Ki Moon; s’ambassadora de sos Istados Unidos in s’ONU, Susan Rice; e sos dirigentes de Nigèria, Tanzània e àteros 30 paisos africanos.
Sa gente at giuiladu cuntenta cando su presidente de su Sudàn de su Sud, Salva Kiir, at iscugugiadu un’istàtua manna de s’eroe de sa gherra tzivile John Garang, s’òmine chi at firmadu s’acordu de paghe de su 2005 cun su guvernu sudanesu.
In mesu de sos cungregados b’aiat unos 200 simpatizantes de su leader rebelle de su Darfùr Abdel Wahed al Nur, chi sos cumbatentes suos sunt gherrende dae oto annos contra a s’esecutivu de Al Bashir in custa regione de su Sudàn. Custas pessones ant naradu a cuncordu frases che a “Bene bènnidu, bene bènnidu, Istadu nou”.
Pagan Amum, segretàriu generale de su Movimentu de Liberatzione de su Pòpulu de su Sudàn (SPLM), su partidu chi guvernat su Sudàn de su Sud, at decraradu a s’agentzia Reuters: “Oe artziamus sa bandera de su Sudàn de su Sud pro nos unire a sas natziones de su mundu. Est una die de vitòria e de festa “.
Ligàmenes: https://it.wikipedia.org/wiki/Sudan_del_Sud
https://it.wikipedia.org/wiki/Referendum_sull%27indipendenza_del_Sudan_del_Sud_del_2011
Leave a comment