«Mentras sos machinàrios de su tempus passadu nche furaiant su traballu a sos operàios e a sa fortza de sas manos issoro, s’Intellighèntzia Artifitziale at a fàghere disacatu mannu a sa genia de sos intelletuales. Custu cheret nàrrere chi fintzas sas atividades de ufìtziu e sos còmpitos de diretzione ant a resurtare in perìgulu». A lu nàrrere est Andria Pignataro, imprendidore bolognesu a cabu de ION Group, chi in sa lista de sos òmines prus ricos de Itàlia est arrivadu a èssere su nùmeru unu. Isse tenet un’idea crara de su chi nos at a isetare pro neghe de s’IA. Pignataro non nde chistionat pensende a unu giogu o una moda, ma comente a una fortza chi diat pòdere mudare pro semper sa manera nostra de traballare.
Su coro de su problema – segundu Pignataro – diat èssere chi s’IA non siat unu “agiudu” ebbia, comente pensant in medas. In veridade, s’IA podet èssere capatze de leare detzisiones e de analizare datos mègius e prus a lestru de a nois. S’ingannu prus mannu est cuddu de su rispàrmiu. Aziendas medas diant pòdere èssere tentadas de litzentziare sas persones pro afidare totu a sos algoritmos, ammajadas dae sas ispesas minores e dae sas capatzidades illacanadas de sos elaboradores. S’avisu de Pignataro est un’invitu a nos fàghere abbistos. Si sas aziendas impreant s’IA pro immannare sos balàngios ebbia, trunchende su personale, sa dita intrea s’at a debilitare.
«S’intellighèntzia artifitziale diat dèpere servire a potentziare s’òmine, no a lu cantzellare dae sos protzessos de produtzione». Narat Pignataro. Est comente una màchina de potèntzia manna: nos podet giùghere a largu ma, si bogamus sas manos dae su volante podimus essire de carrela. Pignataro nos ammentat chi su progressu tenet balore ebbia si abarrat a su servìtziu de sas gente, e no a s’imbesse. In paràulas pòberas, depimus èssere seguros chi siant semper sos òmines a tènnere sa ghia de su cumandu, mescamente cando si chistionat de datos sensìbiles.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment