Aut Rus aut nihil. Putin bi la sighit cun sa narratzione isciovinista narende chi s’Ucraina moderna est un’artifìtziu de Lenin (inoghe est Lenin etotu chi faeddat, sos omissis non mènguant su sinnificu de su pensu suo). Putin at naradu prus de una borta de no àere istratzadu mai sa tèssera de su Pcus. De prus, a bisu suo chie non làstimat s’Unione soviètica privu de coro est. Agiunghende però chi est privu de conca su chi la làstimat comente fiat in contu de chistiones natzionales. Unu de sos errores de Lenin, in sa narratzione putiniana, est su de àere chertu una Unione de repùblicas (e no un’istadu ùnicu che a su zarista) cun deretu de si nch’istesiare dae Mosca. De custa manera sa “decomunistizzazione” sua est sa de si torrare a pigare su chi sos bolscevicos – nât chi – nch’ant tòddidu a sa Rùssia.
Czar non supra grammaticos. Putin at ordinadu chi non giuat a la mutire gherra ma «operatzione ispetziale». E chi nemos si devet atrivire a lu fàghere. Ma semus semper in lìnia cun sa propaganda bèllica de chie si siat movat gherra contra a àtere. “Restore hope” in Somàlia, “Enduring freedom” in Afghanistan e àteras “missiones de paghe”. Do you remember? Gherra! Gherra si narat e gasi devimus sighire a mutire su mèdiu armadu de risolutzione de sas cuntierras internatzionales tipu s’imbiu de armas a Ucraina. Putin giogat cun sos feddos (sas santziones contra a sos oligarcas gherra sunt, su fogu suo nono) gasi comente cale siat àteru atore imperialista. Duncas, comente naraiat Gramsci, sa veridade est semper rivolutzionària. E tando a la mutire gherra siat.
Altum silentium. In custas acontèssidas, però, b’at chie bidet sa gherra che a un’eventu comintzadu custu gioja lardajolu ebbia. E su chi b’at àpidu in custos oto annos in sos tretos orientales de s’Ucraina ite fiat? Si Putin est giustifichende s’operatzione (bèllica) ispetziale sua pro more de unu «genotzìdiu» antirussu in su Donbass, sos atlantistas ant giustificadu sa “missione de paghe” issoro contra a sa Jugoslàvia de Milošević pro more de sa «pulitzia ètnica» serba contra a sos albanesos in Kosovo. Sos atlantistas, mancu a lu nàrrere, mudos che trotza sunt in cara de sa repressione manu militari in su Donbass cun mìgias de mortos (e nudda de Odessa paret chi apant bidu).
Ad captandum vulgus. Putin, in prus de “decomunistizare”, faeddat de “denazificare” s’Ucraina chirchende de mobilitare s’opinione pùblica che chi sos russos nch’esserent torra in intro de una Grandu gherra patriòtica. Sos nazistas in Ucraina bi sunt: mancari su presidente Volodymyr Zelens’kyj siat ebreu e mancari como no apant grandu cunsensu eletorale, sos banderovianos ant determinadu sos sèberos de su presidente nou chi (cheret ammentadu) su 2019 otengeit prus votos in sas zonas russòfonas chi no in aterue. S’oligarca uscente Petro Porošenko definiat a Zelens’kyj unu buratinu de Putin e sos nazistas, una borta eletu, ant minetzadu unu golpe in casu de tzedimentu a sas rechestas de su Cremlinu. Est pretzisu a chistionare de sos raportos de fortza internos in Ucraina, si sunt favorèvoles o mancu a sos antifascistas. Ma est de giudu a nos pregontare cantu s’interventu russu potzat agiudare a sos isciovinistas de cue (e de Rùssia).
Bella matribus detestata. Sas mamas de Ucraina e de Rùssia, in s’ìnteri, pranghent pro fìgios issoro ghetados in su ludu de sa gherra. E cando semus faeddende de mamas non semus faeddende de fìgios ebbia ma de “prole”. Una “prole” chi finamentas sos comunistas-patriòticos de Gennadij Zjuganov no indiritzant contra a su capitalismu russu ma contra a àteros pòpulos.
Vim vi repellere licet. Como, a banda de su chi b’at àpidu in Odessa e in su Donbass (chi mai at a èssere a banda ma chi mai at a èssere ìnditze de s’adesione de totus sos ucrainos a su nazismu) chie semus nois pro non reconnòschere su deretu de sos ucrainos a si defensare dae s’invasione russa? S’antimperialismu de s’imperialismu russu (chi duncas antimperialista no est, nemmancu “ogetivamente”) no est prus pagu reatzionàriu de su guvernu ucrainu. Ma su cunfrontu cheret chi lu fatzamus fintzas cun àteros cuntestos. Su guvernu de Saddam non fiat reatzionàriu? Emmo chi lu fiat, ma mancari cussu amus reconnotu su deretu se sos irachenos a sa resistèntzia contra a sa “Coalition of the Willings” ghiada dae Bush. Chie como, movende dae positziones de manca, est contràriu a sa resistèntzia, perunu agiudu lis dat a sos ucrainos pro cumprèndere chi sa Nato no est una risposta, chi sa Nato no est una garantzia. Cunforma a custa positzione sos ucrainos diant devent fàghere colare sas trupas russas sena chi lis essat alenu. A su matessi tempus. Pro ite sos atlantistas chi impuntzant sa resistèntzia ucraina no ant reconnotu sa resistèntzia e su deretu a sa defensa de sas populatziones de su Donbass? Cussos terroristas fiant?
Fures privatorum furtorum in nervo atque in compedibus aetatem agunt, fures publici in auro atque in purpura. Un’àtera fratura bi l’amus cando faeddamus de sos meres capitalistas partzende·los in imprenditores inoghe e oligarcas in cue. Che chi sos “nostros” esserent bonos e sos de cuddae nono. Beru est chi su tèrmine “oligarca” movet dae su protzessu de acumulatzione chi amus bidu cun sa derrota de su sotzialismu reale, cun sa formatzione de una classe furona ingurtende·si·nche sas richesas de s’istadu, e duncas pùblicas. Ma cheret chi nche pongiamus a banda s’istùdiu e s’anàlisi pro non bìdere chi finamentas inoghe su poderiu de sos pagos est mantesu dae s’acumulatzione de sa richesa produida dae sos traballadores e dae sa legislatzione a vantàgiu issoro. E inoghe comente in cuddae, sas presones sunt prenas de ladros de puddas. P.s de oligarcas est prena s’Ucraina, est a nàrrere de sos chi dae custa gherra b’ant a balangiare bincat o mancu sa Rùssia.
Quidquid delirant reges, plectuntur operarii. Petzi un’anàlisi limitada podet bìdere in Putin unu macu, unu irratzionale. Sas polìticas bèllicas suas sunt totu francu chi irratzionales. At isetadu su chi issu pensat siat su momentu giustu pro mòvere gherra a s’Ucraina. E che a sos de sa Nato ischiat chi a tardu a chitzo sa de sa gherra fiat una de sas optziones in campu. E nemmancu sos de sa Nato sunt macos o irratzionales. Sa cuntierra militare intre sos imperialismos est una cunsighèntzia de sa cuntierra econòmica. Duncas si b’at delìriu intre sos guvernantes est ca delirante est su sistema de produtzione chi ingendrat suferèntzias peri su mundu, lu bidamus o mancu dae domo nostra. Sos chi bi pranghent sunt sos traballadores: sos chi produint sa richesa chi sos guvernantes destinant a sa gherra; sos chi sufrint sas gherras chi sos guvernantes disinnant. Fintzas sas santziones, a concruos, cajonant dannu prus a sos traballadores chi no a sos oligarcas.
Prius antidotum quam venenum. Sa gherra est unu velenu. Alimentat sos natzionalismos e, sena reatzione internatzionalista, ponet sos traballadores e sos giòvanos s’unu contra a s’àteru. L’amus iscumproadu paritzas bortas su tempus coladu e diamus dèvere àere imparadu sa letzione. Duncas pro disarmare da gherra cheret chi disarmemus sas polìticas de chie, mancari a pustis de duos annos de pandemia, sighit a destinare su bonu de su dinare pro s’annestru bèllicu e pro sos armamentos. Comente ant naradu sos traballadores de Gkn in Frorèntzia, «sa gherra est cussu protzessu chi non nos agiudat a cumprèndere si est issa sa chi serbit a s’indùstria bèllica o si est s’indùstria bèllica chi serbit a issa. Su gastu militare no lu cresches si non cheres impreare sa fortza e, a tardu o a chitzo, sa fortza l’as a dèvere impreare pro giustificare su gastu militare. E custu gastu creschet mancari in sa sotziedade b’apat austeridade dae deghènnios». Sa richesa chi produimus a su bene comunu chi torret!
Aequalitatis non parit bellum. Custu cheret nàrrere duas cosas ebbia. Chi est ora de nche lassare a banda su tifu pro unu o pro s’àteru cada borta chi b’at crisi internatzionale. E chi est ora de torrare a cuntzepire un’alleàntzia internatzionale intro sos traballadores de su mundu. S’agualidade chi nos bogant est sa chi at bìnchere contra a sa gherra. Cheret chi la conchistemus.
màuru piredda (pàrrere)
Leave a comment