Evangèliu segundu Giuanne [G 10, 27-30]
In cussu tempus Gesùs aiat naradu: “Sas berbeghes meas ascurtant sa boghe mea e deo las connosco e issas mi ponent in fatu.
Deo lis do sa vida eterna e no ant a abarrare pèrdidas in eternu e nemos las at a arrangare dae sa manu mea.
Su Babbu meu, chi mi las at dadas, est su prus mannu de totus e nemos las at a pòdere arrangare dae sa manu de su Babbu. Deo e su Babbu semus una cosa ebbia».
Cummentu
“Deo so su pastore bonu”
Cando Gesùs narat: “Deo connosco a is berbeghes meas” bolet nàrrere chi ddas amat e cando agiunghet “is berbeghes connoschent a mie” inditat chi s’amore suo est ricambiadu.
Pro custu depimus pedire a nois etotu si semus berbeghes de su Sennore e si ddu connoschimus a beru, a issu chi est sa via, sa beridade, sa vida e in custu casu, sa conseguèntzia diat èssere chi nois divenimus su sale de sa terra e lughe de su mundu.
Ca, comente iscriet Giuanne: “Cussos chi narant: connosco a Deus, ma non respetat is cumandamentos suos, sunt faulàrgios” (1 G 2,4). E cando Gesùs agiunghet “Comente su Babbu connoschet a mie, deo connosco a su Babbu e so connotu dae su Babbu; e dono sa vida mea pro is berbeghes” inditat a manera esplìtzita cale est sa dimensione de s’amore suo pro su Babbu: s’amore pro su cale morit pro is berbeghes suas. Est sa dimensione de sa rughe.
Su pastore bonu at dadu sa vida sua pro is berbeghes, pro mudare su corpus suo e su sàmbene suo in su sacramentu nostru: unu sacramentu chi atzatat cun su màndigu de sa carre sua is berbeghes chi aiat riscatadu.
(rubrica a incuru de Alessandro Dessi)
Leave a comment