– de Sarvadore Serra –
Si faeddat meda de sa proibitzione de sos agiudos de Istados dae bandas de s’Unione europea. Sa veridade est chi sa proibitzione de sos custos agiudos no est assoluta. A custu propòsitu, est interessante a lèghere una publicatzione de su Guvernu de sa Canàrias, traduida dae s’ispagnolu a su sardu.
Su cuntzetu de agiudos de Istadu in campu europeu benit dae s’artìculu 107, comma 1 de su TFUE, chi los definit comente “sos agiudos cuntzèdidos dae sos Istados o cun fundos istatales, in cale si siat forma, chi falsent o minetzent de falsare sa cuncurrèntzia, favorende impresas o produtziones determinadas”, “in sa mesura chi interessent sos cuncàmbios cummertziales intre sos Istados membros”.
Sunt bator sos elementos chi caraterizant sos agiudos de Istadu. Los previdet s’artìculu 107,1. Sa normativa chi nos interessat s’àplicat petzi si custos elementos bi sunt totu paris:
- Trasferimentu de resursas istatales, in su sensu prus mannu:
- Podent bènnere dae cale si siat autoridade de s’Istadu in chistione, siat natzionale, regionale o locale, in manera direta o pro mèdiu de un’istitutzione o organismu de caràtere pùblicu.
- Podent èssere cuntzèdidas in manera direta dae s’organismu pùblicu, o pro mèdiu de un’intermediàriu pùblicu o privadu.
- Su trasferimentu de resursas podet tènnere una variedade manna de formas: suventziones, miminòngiu de tassos de interessu, garantzias de crèditu, benefìtzios fiscales, etc.
- Profetu económicu: Pro cualificare unu trasferimentu de resursas estatales a un’ impresa comente agiudu de Istadu, tocat chi s’impresa in chistione apat otentu pro mèdiu de custu trasferimentu unu profetu econòmicu ispetziale chi non diat àere otentu in s’isvilupu normale de s’atividade sua.
- Caràtere seletivu: Custu caràtere est fundamentale e faghet distìnghere sos agiudos istatales dae sas chi lis narant “mesuras generales”. Sos agiudos istatales non si àplicant a sa generalidade de sas impresas, ma a unu grupu de sas matessi chi tenent una sèrie de recuisitos istabilidos dae s’ Istadu in chistione (p. e., seletividade in funtzione de su setore o de s’àrea geogràfica). A su contràriu, una mesura de caràtere generale s’at a aplicare a sa totalidade de sos setores econòmicos a livellu natzionale.
- Ripercusiones in sa cuncurrèntzia e in sos cuncàmbios cummertziales: Si intendet chi un’agiudu tenet o podet tènnere influèntzia in sa cuncurrèntzia e in sos cuncàmbios cummertziales intre sos Istados membros si su benefitziàriu de sa matessi isvilupat unu carchi tipu de atividade econòmica e òperat in unu mercadu in ue b’at cuncàmbios cummertziales intre sos Istados membros, indipendentemente dae sa natura giurìdica de custu benefitziàriu.
Proibitzione generale de sos agiudos de Istadu
Sos agiudos de Istadu, in generale, sunt “incumpatìbiles cun su mercadu internu”(art. 107.1 TFUE). Duncas sa Cummissione Europea est garante, fundamentalmente pro mèdiu de sa “Diretzione Generale de sa Cuncurrèntzia”, de sa cuncurrèntzia efetiva e de su cummèrtziu lìberu intre sos Istados membros in cunditziones ecuitativas, chi diant pòdere tènnere dannu dae s’impreu indiscriminadu de mesuras seletivas dae bandas de sos Istados membros pro favorire o difèndere impresas determinadas o grupos de impresas in funtzione de critèrios de polìtica econòmica petzi natzionales, sena tènnere in cunsideru sos interessos comunos de s’Unione Europea e su rispetu de sas libertades fundamentales de su Tratadu.
Etzetziones a sa proibitzione generale
Belle gasi, s’artìculu 107 etotu de su TFUE, in sos commas 2 e 3, ponet duas categorias de agiudos cumpatìbiles cun su mercadu internu:
- Mesuras semper cumpatìbiles (artìculu 107. 2 TFUE): si tratat de mesuras chi, mancari falsent sa cuncurrèntzia e influèntzient sos cuncàmbios cummertziales, sunt decraradas cumpatìbiles cun su mercadu comunitàriu. Pro su chi pertocat custas mesuras su testu de s’artìculu est bastante craru e non rechedet àteras esplicatziones:
“Ant a èssere cumpatìbiles cun su mercadu internu:
- a) sos agiudos de caràtere sotziale cuntzèdidos a sos consumadores individuales, semper chi los diant sena discriminatziones fundadas in s’orìgine de sos produtos;
- b) sos agiudos destinados a reparare sos dannos causados dae disastros naturales o dae àteras acuntèssidas de caràtere istraordinàriu;
- c) sos agiudos cuntzèdidos pro favorire s’economia de regiones determinadas de sa Repùblica Federale de Germània, tocadas dae su partzimentu de sa Germània, in sa mesura chi siant netezessàrias pro cumpensare sos disvantàgios econòmicos chi benint dae custu partzimentu. […].”
- Mesuras cumpatìbiles pro cantu lu detèrminet sa Cummissione (artìculu 107. 3 TFUE): b’at una sèrie de agiudos chi podent èssere cumpatìbiles cun su mercadu internu, ma chi in antis los devet analizare sa Cummisione, sa cale at a dètzidere si b’at giustificatzione bastante pro los cuntzèdere:
“S’ant a pòdere cunsiderare cumpatìbiles cun su mercadu internu:
- a) sos agiudos destinadas a s’isvilupu econòmicu de regiones in ue su livellu de vida siat bassu in manera anormale o in ue b’apat una situatzione grave de sutaocupatzione, e fintzas su de sas regiones cuntempladas in s’artìculu 349 (regiones ultraperifèricas, comente sas Canàrias), tentu contu de sa situatzione istruturale, econòmica e sotziale issoro ;
- b) sos agiudos pro animare sa realizatzione de unu progetu importante de interessu comunu europeu o destinadas a pònnere remèdiu a una perturbatzione grave in s’ economia de un ‘ Istadu membru;
- c) sos agiudos destinados a favorire s’isvilupu de atividades determinadas o de regiones econòmicas determinadas, semper chi no àlterent sas cunditziones de sos cuncàmbios in forma contrària a s’interessu comunu;
- d) sos agiudos destinados a promòvere sa cultura e su mantenimentu de su patrimòniu, cando no àlterent sas cunditziones de sos cuncàmbios e de sa cuncurrèntzia in s’Unione contra a s’interessu comunu;
- e) sas àteras categorias de agiudos chi determinet su Cussìgiu cun detzisione leada a pustis de una proposta de sa Cumissione.”
- Mesuras cumpatìbiles cun tzircustàntzias istraordinàrias (artìculu 108. 2 TFUE): in fines, b’at de tènnere in contu su dispostu de s’artìculu 108.2, comma 3 de su TFUE:
“A dimanda de un’Istadu membru, su Cussìgiu at a pòdere detzìdere, a s’unanimidade e non ostante su dispostu de s’artìculu 107 o de sos regulamentos prevididos in s’artìculu 109, chi s’agiudu chi at cuntzèdidu o chi at a cuntzèdere custu Istadu siat cunsideradu cumpatìbile cun su mercadu internu, cando tzircustàntzias istraordinàrias giusìfichent custa detzisione. […].” Duncas, su Cussìgiu podet autorizare, in manera istraordinària, agiudos de Istadu chi non tèngiant sos recuisitos de s’artìculu 107 de su TFUE, nen de sos regulamentos de isvilupu chi apat adotadu pro categorias determinadas de agiudos. Sa giustificatzione de sa netzessidade de sa mesura devet èssere aportada da s’ Istadu in chistione e èssere giuigada sufitziente dae su Cussìgiu a s’unanimidade.”
Leave a comment