Su setore de sa produtzione automobilìstica europeu est in crisi e diat èssere tropu fàtzile a ghetare sa neghe a sos disinnos continentales in contu de transitzione energètica. Ca si est beru chi dae ocannu sas aziendas devent rispetare s’emissione mèdia de 93,6 grammos de anidride carbònica a chilòmetru (e custu cheret nàrrere chi sa cuota de sas àutos elètricas bèndidas devet colare dae su 15 a su 37%), cheret chi pongiamus in contu finamentas un’àteru datu: is chi còmporant cherent màchinas baratas, che a sas tzinesas, o de segunda manu. Difatis s’annu coladu, in mèdia, in Itàlia amus comporadu 197 màchinas usadas cada 100 noas (su mese de santandria su raportu fiat de 222 a 100).
Ma sa crisi de su chi li narant automotive, est betza meda e torrat cun su contu de unu mercadu in suferèntzia e cun livellos artos de subraprodutzione. E si duncas paret fàtzile a bìdere sa càusa de sa crisi in sa transitzione energètica, a su chi semus bidende diat pàrrere finamentas prus fàtzile a agatare sa solutzione: acò·la tando, narada a cuscusina, sa proposta de cunvertire s’indùstria automobilìstica conca a sa produtzione de sa cumponentìstica bèllica.
Sa Germània est dende carchi esèmpiu cun sa Rheinmetall. Custu colossu, chi tenet una divisione àuto cun pistones, cumponentes pro sistemas de aspiratzione, catalizadores, pompas, cuscinetos e àteru, at annuntziadu sa recunversione de sas fàbricas de Berlinu e Neuss in polos ìbridos pro sa produtzione militare.
Ma, cunforma a su chi si leghet in infodifesa.it, fintzas in Itàlia nche semus giai in intro de sa trasformatzione: «Sa joint venture intre Leonardo e Reihnmetall pro sa produtzione de mezos coratzados rapresentat unu primu singiale. Fintzas Iveco defense est potentziende sas atividades suas in su cumpartu bèllicu. E sighende fontes industriales, finamentas Ferrari est valutende collaboratziones cun aziendas de su setore militare». Mentovadu unu raportu de su Senadu cun datos chi cunfirmant sa tendèntzia: «Cada èuro investidu in su setore de sa Difesa nd’ingendrat 1,6 de valore agiuntu, su 71% in prus cunforma a sa mèdia natzionale».
S’allega est polìtica. E fintzas sindacale. No est duncas a cummentare ebbia sa presèntzia de sa Cgil in sas pratzas pro s’Europa (comente sa manifestatzione proposta dae Michele Serra). Si Landini tenet resone cando narat chi sos 800 milliardos sunt bogados a s’istadu sotziale, resone prus manna diat dèvere àere annuntziende una reatzione operaja contra a custa recunversione.
mauro piredda
immàgine Marco Merlini