Su 2025 cumintzat in unu clima de tensione polìtica, siat in Sudamèrica siat in s’Oriente atesu. Sunt duos sos paisos chi sunt bivende una crisi istitutzionale manna: Corea de su Sud e Venetzuela.
In Seùl su presidente sudcoreanu Yoon a sa fine est istadu arrestadu. Sas primas duas bortas chi sas autoridades aiant provadu a ddu pònnere in presone non nche fiant resurtadas.
Imbetzes oe, 15 de ghennàrgiu, su presidente suta acusa at atzetadu de lassare sa residèntzia sua e de èssere ghiadu a sos ufìtzios de s’agentzia anticorrutzione. S’òmine però no at chertu faeddare, giaia chi cunsìderat custa detzisione de ddu prèndere illegale.
Dae in ie nche dd’ant leadu a presone. Como sa magistradura tenet 48 oras de tempus pro dd’interrogare. A coa ant a tènnere bisòngiu de aterunu mandadu pro ddu pòdere tènnere inserradu pro àteras binti dies o si nono ddu liberare.
A s’àtera ala de su mundu aterunu presidente, issu puru in mesu de crìticas e acusas, at giuradu, su 10 de ghennàrgiu coladu, pro su de tres mandados.
In Venetzuela Nicolás Maduro, chi segundu s’opositzione at bintu sas eletziones pro more de trampas, at fatu votu de lealtade subra sa costitutzione bogada dae Hugo Chávez.
Maduro at giuradu in dae in antis de su presidente de s’Assemblea Natzionale Jorge Rodríguez “in nùmene de Deus Onnipotente, pro s’erèntzia infinida de Simón Bolívar, liberadore de su Sudamèrica, pro sos majores suos primigènios e pro s’onore suo”.
Su mandadu presidentziale est de ses annos. Sos paisos chi non reconnoschent sa vitòria de Maduro sunt Canadà, Istados Unidos, Repùblica Dominicana, El Salvador, Guatemala, Costa Rica, Pànama, Ecuadòr, Perù, Tzile, Argentina, Uruguay e Itàlia. Sos àteros paisos de s’Unione Europea, paris cun Mèssicu, Colòmbia, Brasile e Paraguay pedint imbetzes chi torrent a contare sos votos in presèntzia de osservadores internatzionales e neutrales.
(gianni muroni)
Leave a comment