Est resèssidu a nàrrere carchi cosa a is fideles custa chida santa. Sa boghe sua domìniga colada, pro is prammas, e gasi etotu sa de eris bneighende sa gente acudida a prtaza de Santu Pedru, fiat suferente a beru. In custas dies fiat resèssidu a collire agigu de fortzas pro si nch’istare un’iscuta in mesu de tzitadinos impresonados chi die cun die, nois, nos nd’ismentigamus. A custa gente bi l’aiat naradu su die de Santu Istèvene: «pro ite bois in intro e deo nono?». E gasi sas pregadorias suas fiant indiritzadas a is suferentes de s’Ucraina, de sa Palestina e de àteras terras destruidas. Custu fiat paba Frantziscu, su pontèfitze lòmpidu «dae sos concruos de su mundu», comente aiat naradu issu etotu. Jorge Mario Bergoglio, custu su nùmene suo, naschet su 1936 in Buenos Aires dae una famìlia de orìgine italiana. Si nche morit su lunis de Pasca, sa die a pustis chi su Sennore suo est resuscitadu. A issu nche l’aiant ricoveradu dae su 14 de freàrgiu a su 23 de martzu ma sa suferèntzia sua l’at acumpangiadu finas a s’iscuta de tancare sos ogros de su totu. Fiat du de 266 pontèfitzes de sa crèsia catòlica. Su 1958 intreit a seminàriu cun sos gesuitas finas a divènnere cardinale su 2001 cun Paba Giuanne Pàulu II. Su 2013 lu faghent paba a pustis de sas dimissiones de Beneitu XVI. In bestes arbas, Frantziscu at faeddadu de sos temas de custu tempus: dae sa giustìtzia sotziale a su contivìgiu de s’ambiente. Cun s’entzìclica “Laudato si’” de su 2015 at istèrridu paràulas contra a su cambiamentu climàticu; cun sa de su 2020 “Fratelli tutti” nch’est intradu a intro de s’amistade sotziale intre sos òmines. Ma suo fiat unu progressismu gesuita chi non si nche podiat istesiare dae sas raighinas traditzionalistas chi l’ant nudrigadu in totu sa vida religiosa sua. In sa prus cunservadora de sas entzìclicas, “Lumen Fidei” de su 2013 chi aiat comintzadu Beneitu XVI, essit cun fortza su ruolu de sa famìlia in sa sotziedade comente unione matrimoniale intre òmine e fèmina ebbia. Dae pagu aiat faeddadu male dei mèigos abortistas narende·lis “sicàrios”. De onni manera si nch’andat una figura chi at fintzas proadu a nàrrere sa sua pro sas gherras de oe, Ucraina e Palestina. E si nche morit pròpiu cando una fase noa, prena de incògnitas, s’est aberende.
mauro piredda
immàgine https://it.wikipedia.org/wiki/File:Portrait_of_Pope_Francis_(2021)_FXD.jpg
Leave a comment