Sa chistione de custas dies, chi non si lìmitat a sas acontèssidas de Palermu ma finas a sas de Nàpoli, sunt galu in s’agenda de sos mèdios chi sighint a las contare, de sos atores polìticos chi devent dare una risposta, de sos chi traballant in sas comunidades pro chi su rispetu siat sa règula, de sos cummentadores peri sos logos reales e virtuales chi nde permitint s’allega.
Intre custos est fàtzile a agatare duas castas de pensos chi, ne unu nen s’àteru, dant unu contributu a sa chistione, polarizende·si pari-pari e lassende sas cosas gasi comente sunt.
Su primu grupu est su de sos giustitzialistas chi diant risòlvere sa chistione cun interventos in sas carenas de sos òmines (sa “castrazione chimica”) pro chi non si torrent a permìtere; su segundu est su chi isterret s’allega movende·nche sa mirada dae s’agressore a sa vìtima.
Su primu grupu pensat petzi a s’interventu repressivu finas a s’ùrtimu crastadu (paret sa matessi allega de sa chirca de sos iscafistas peri su “globo terracqueo”). Sos segundos punnant a cumbìnchere sa fèmina a non si bestire galana e ammajadora, a non si bufare carchi cosa fintzas issa, a no essire a de note, a non nche colare in logos perigulosos. Duncas sa fèmina non est “lìbera de” fàghere totu custu, nen “lìbera dae” custu pregiudìtziu maschilista.
Su malu est cando a custu pregiudìtziu si b’annanghet su giudìtziu de chie isterret sentèntzias chi ratìficant custu pensu. Cheret chi nos ammentemus de cussa de su tribunale de Frorèntzia su mese de martzu coladu cando a duos giòvanos imputados pro un’istupru de grustu los assolveint ca no aiant «cussèntzia prena de sa mancàntzia de cunsensu» de sa pitzoca violada chi nât chi fiat alterada pro more de su bumbu e chi, cunforma a su giùighe, in su tempus coladu si fiat cumportada ingendrende «malecumpresas».
Ma no est unu problema de fartas legislativas. In Itàlia – istadu chi at retzidu cundennas dae sa Corte europea de sos deretos umanos pro àteras sentèntzias pagu prus o mancu che a custa, ma chi acollit finamentas sas dispositziones noas de sas cunventziones internatzionales – s’artìculu 609 bis narat chi sa pena pro su reatu de istupru balet fintzas pro chie abusat «de sas cunditziones de inferioridade fìsica o psìchica de sa persone ofesa in su su momentu de s’acontèssida». Duncas finas si sa vìtima at bufadu.
Su chi mancat in Itàlia est una lege crara che a s’ispagnola “ley del solo sí es sí” ( «Sólo se entenderá que hay consentimiento cuando se haya manifestado libremente mediante actos que, en atención a las circunstancias del caso, expresen de manera clara la voluntad de la persona»). E, mescamente, s’idea chi sa sessualidade lìbera de una persone non potzat èssere còntiga pro la violare.
màuru piredda
Leave a comment