A metade de ghennàrgiu Israele e Hamas aiant sigladu sa trègua a pustis de 15 meses de distrutzione in Gaza. Ma dae martis su 18 de martzu, in intro de su Ramadan, s’esèrtzitu israelianu est torrende a bisestrare s’Istrìscia annanghende àteros 400 mortos (petzi su primu die) a s’elencu chi giai fiat istremenadu. Sos aèreos de s’istadu sionista ant bombardadu cussos tretos dae nord a sud: Jabaliya, Beit Hanoun, Tzitade de Gaza, Nuseirat, Deir el-Balah, Khan Younis e Rafah. Fintzas s’àrea de al-Mawasi, inditada comente zona umanitària dae Tel Aviv (ite si no lu fiat…), at connotu su passàgiu de sa frullana de Netanyahu. Iscolas mudadas in amparos, domos giai mesu derrutas, tendas pro disamparados: no ant fatu diferèntzia peruna. Ma cale est sa resone de custa atzione israeliana? Mescamente de dura polìtica de su guvernu suo, una coalitzione in ue in intro, in prus de su Likud, b’at bator partidos de sa dereta religiosa ebràica. Dae pagas dies su partidu Otzma Yehudit (Poderiu ebràicu) de Itamar Ben-Gvir nch’est torra in intro de s’alleàntzia e de s’esecutivu garantende sa majoria in intro de su parlamentu Knesset e duncas sos nùmeros pro s’aprovu de su bilàntziu de s’istadu (cosa chi cheret fata pro chi su guvernu non ruat). Ma si custa est un’iscadèntzia chi cheret colada, àteras sunt sas punnas. Che a sa de nche bogare su diretore atuale de su Shin Bet (s’intelligence de s’istadu sionista) Ronen Bar, reu de èssere contràriu a bombardamentos noos e de ghiare sas indàgines pro cumprèndere si in sas acontèssidas de su 7 de santugaine de su 2023 b’at àpidu una responsabilidade de su guvernu in contu de preventzione de sos atacos de Hamas. Custa fase noa de s’ofensiva israeliana in Gaza, a pustis de su pasu, no ispantat. Est dae pagu chi dae Tel Aviv ant disinnadu de blocare sos agiudos a Gaza. Su sustegnu de Trump est in favore de su guvernu de Bibi, ma creschent sas protestas de sa populatzione chi diat chèrrere a sighirent sas tratativas cun Hamas pro sa liberatzione de is chi galu sunt presoneris de su grupu palestinesu.
mauro piredda
immàgine Jolanda Flubacher via flickr