Foto leada dae scottishrugby.org
Su Ses Natziones s’at a detzìdere in s’ùrtimu turnu, pro more de sos resurtados de custa ùrtima chida.
In sa partida de chenàbura 6 s’Irlanda at rispetadu su pronòsticu contra a su mègius Galles de su torneu. Giai a su 6’ l’ala irlandesa Stockdale intrat leve in sa difesa gallesa. Cun sa trasformatzione de Crowley faghet 7-0. Crowley etotu marcat sa segunda meta. Sos dragones però, chi giai aiant fatu 3 puntos de punitzione, rispondent a tempus iscadidu cun su pilone Carré in positzione de ala manca e cun sa trasformatzione andant 12-10.
Sas duas iscuadras in su segundu tempus marcant una meta peròmine, cun sas tertzas lìnias Conan a su 63’, Irlanda, e Botham a su 68’, Galles. S’estremu Osborne e torra Crowley de punitzione dant àteros 5 e 3 puntos a sos irlandesos, cun su Galles chi patit s’ammonitzione a su medianu Williams a su 68’. Finale 27-17.
Sàbadu 7 in Edimburgu sa prima sorpresa de sa die, cun s’Iscòtzia chi dat addiritura 50 puntos a sa Frantza, sighende·dda in testa a sa classìfica. Su primu tempus finit 19-14 cun sos iscotzesos chi marcant tres metas, a su 5’ cun s’ala destra Graham, a su 26’ cun s’ala manca Steyn e a su 32’ cun su pilone Schoeman, cun duas trasformatziones de Russell. In s’atzione de s’ùrtima meta est ammonidu Jalibert. Sa Frantza nde marcat duas, a su 18’ cun s’ala Bielle-Biarrey a pustis de botza furada dae su capitanu frantzesu Dupont a cuddu iscotzesu Tuipulotu, e a su 22 cun s’àtera ala Attissogbé, ambas duas trasformadas dae Ramos.
In sa ripresa s’Iscòtzia andat in meta àteras bator bortas a fila a pare: a su 20’ cun White, a su 51’ cun Steyn, a pustis de botza pèrdida dae Dupont placadu dae White, a su 59’ cun Graham e a su 63’ cun su tzentru Jordan, subentradu a Jones, a pustis de mìschia cuntzèdida pro unu passàgiu a in antis de Dupont. Sos frantzesos torrant a marcare, lompende a su bonus ofensivu, a su 66’ cun Dupont, a su 74’ cun Ramos, a su 78 cun Jégou e a tempus iscadidu torra cun s’estremu Ramos. In mesu a custas marcaduras una punitzione de Russell. Finale 50-40.
Sa segunda sorpresa benit dae sa prima vitòria de s’Itàlia contra a s’Inghilterra. Sa partida est echilibrada e su primu tempus finit 12-10 pro sos inglesos, cun metas de Freeman a su 26’ e de s’ala Roebuck a tempus iscadidu, cun in mesu sa meta italiana de Menoncello a su 34’.
In sos segundos 40 minutos, a pustis de una punitzione de Fin Smith e duas de P. Garbisi, chi mandant sas iscuadras 18-16 pro sos istràngios, arribat sa meta detzisiva de Marin a su 72’. In antis s’Itàlia e a coa s’Inghilterra ant tentu ammonitziones: Nicotera a su 52’, Underhill a su 57’ e Itoje a su 64’. Finale 23-18 pro s’Itàlia.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment