S’Europa orientale est in avolotu. Non ddo’est sa gherra in Ucràina ebbia o su caos polìticu e giuditziàriu in Romania. In sa ex Jugoslàvia sa Bòsnia Erzegòvina est bivende una crisi chi est ètnica e istitutzionale a su matessi tempus.
S’entidade istatuale nàschida a pustis de sa gherra tzivile chi at giùghidu a sa fine de sa federatzione jugoslava est una creadura artifitziale, partzida comente est in duas partes, sa Federatzione de Bòsnia e Erzegòvina e sa Repùblica Serba de Bosnia e Erzegòvina.
Pròpiu sa Repùblica Serba est manifestende semper prus a forte su disìgiu de si torrare a unire a sa Sèrbia.
Est de chida passada, su 26 de freàrgiu, sa cundenna in primu gradu, dae parte de sa Corte Suprema de Sarajevo, a un’annu de presone e a ses annos de interditzione dae sa vida polìtica de su presidente Milorad Dodik (in sa foto).
S’acusa est de àere suspèndidu sas publicatziones in sa gazeta ufitziale de sa repùblica de sas deliberatzione de s’Artu Rapresentante pro sa Bòsnia Erzegòvina, su tedescu Christian Schmidt.
Sa figura, istituida in su 1995, est seberada dae su comitadu diretivu, chi nde faghent parte USA, Regnu Unidu, Rùssia, Cànada, Germània, Itàlia, Giapone, Frantza, a prus de s’Organizatzione pro sa Cooperatzione Islàmica e sa Cummissione Europea, de unu cussìgiu internatzionale chi faghet de sa Bòsnia, de facto, unu protetoradu.
In custu modu Dodik at fatu a cumprèndere ca non reconnoschet peruna influèntzia istràngia in su territòriu suo.
Prus a in ie de sas decraratziones ufitziale est craru chi s’obietivu est un’unione de totu sos serbos.
Una regione che a sos balcanos in ue bivent ammisturados pòpulos de ratza, limba e religione diferentes non podiat èssere partzida segundu critèrios ètnicos pròpiu pro s’impossibilidade de istabilire làcanas craras, si non cambiende a fortza pupulatziones intreas dae un’ala a s’àtera.
Sas gherras chi ant degolliadu sa Jugoslàvia pro una deghina de annos, dae su 1991, caraterizadas finas dae sos interventos militares de sa NATO, no ant dadu una solutzione a sos problemas de cunvivèntzia intre sos diferentes grupos, chi in Bòsnia sunt serbos, croatos e bosgnacos, est a nàrrere sos islavos de religione islàmica.
A pustis de 30 annos si torrant a presentare sos disìgios natzionales a unu chirru e s’interventismu otzidentale, atzetadu semper prus pagu dae sas populatziones locales, a s’àteru.
(gianni muroni)
Leave a comment