Ammentende nos lu semus de cando, su mese de martzu de su 2023, su deputadu de FdI Fabio Rampelli aiat istèrridu una proposta de lege contra a sos inglesismos? Su parlamentare de su partidu de Giorgia Meloni punnaiat a contraventziones mannas, finas a 100mìgia èuros, pro is responsàbiles de s’Amministratzione pùblica chi los impreaiant. Sa cosa curiosa – a tempus suo nos l’amus rìsida pro non prànghere – est chi in su matessi guvernu b’aiat e b’at unu ministeru de su Made in Italy. Fatu-fatu, pro s’annu iscolàsticu 2024-25 ant faeddadu de su Litzeu de su Made in Italy.
Italians do it better? No, is americanos sunt faghende finas peus. E non contra a sos inglesismos – mescamente como chi s’inglesu l’ant decretadu comente limba ufitziale de sos Istados unidos – ma contra a una lista de paràulas de limitare o de nche tòddere dae intro de sos sitos web guvernativos. Una de custa est “gay”. A su puntu chi in su situ de su Pentàgonu non bi sunt prus sas fotografias de su bombarderi B-29 Superfortress chi su 6 de austu de su 1945 isgantzeit a Little Boy, sa bomba atòmica nòdida subra de sa tzitade giaponesa de Hiroshima.
Si giai fadeit ispantu su sèberu de Paul Tibbets, su pilota cun sos RayBan iscurosos cantadu dae Augusto Daolio, de iscrìere a pinzellu su nùmene criadore de sa mama (Enola Gay) in una bèstia metàllica intregamorte, ite b’at de nàrrere de is chi timent prus sa visione de una paràula chi non su disacatu nucleare annuntziadu e cajonadu dae sas àeras? Si b’at galu bisòngiu de acrarire su cuntzetu de omofobia istitutzionale, custa est una proa làdina làdina. Sa parola “gay” no est in cunformidade a sas lìnias ghia emanadas dae su Segretàriu de sa Difesa Pete Hegseth. Fired!
Ma sigomente s’omofobia non bastat, tando acò fintzas una pinzellada de ratzismu: bogadas fintzas sas fotografias cun sordados nieddos, eroes de sa segunda gherra mundiale. Sa chi sighit est sa lista de sos faeddos (istèrrida dae su New York Times) chi s’amministratzione presidentziale americana noa at disinnadu de limitare, de torrare a bìdere o de vedare dae sitos guvernativos, documentos ufitziales, programmas iscolàsticos e gasi sighende·bi·la. Acontzos!
mauro piredda
