In contu de Ram, sa memòria volàtile chi bi devet èssere pro fàghere funtzionare unu smartphone o unu pc, custu 2026 no est comintzende in sa mègius manera. In custos duos meses ebbia, sos prejos issoro sunt crèschidos de belle tres bortas cunforma a sos chi amus connotu a concruos de s’annu coladu. Su resurtadu est chi no est prus una cosa lèbia s’assemblàgiu de unu personal computer o sa còmpora de unu laptop de fàscia arta.
Sa cajone de custa crèschida de sos prejos non cheret chircada in su mercadu consumer, ma in aterue: in s’impreu massissu de s’intelligèntzia artifitziale. Comente? Sa risposta nos la sunt dende sos provider mannos de servìtzios de cloud e sos gigantes de su setore hi tech: pro alimentare sos modellos issoro de IA, sos tzentros de datos tenent bisòngiu de cantidades prus chi non mannas de memòrias lestras de ùrtima generatzione Hbm e Ddr5. Gasi faghende, sos produtores de semicondutores – pighende nuscu de màrghines ampros de profetu – ant cunvertidu lìnias produtivas pro intreu minimende de meda s’oferta pro sos mòdulos destinados a sos computadores de domo.
Che chi sa cosa non bastaret, sa cunditzione est fintzas peorada pro more de sos rallentamentos de s’estratzione de unas cantas matèrias primas netzessàrias pro sos substratos de sas memòrias. Nd’essit a campu una mèngua de iscortas chi est isboidende sos magasinos e ponende anneos a sos consumadores finales. Pro custos utentes sas cunsighèntzias sunt graes a beru. S’annu coladu unu kit de 32 gigas de casta Ddr5 fiat cosa atzessìbile, como nono. Est pro custu chi sunt medas sos produtores de portàtiles chi sunt reduende sas ispetzìficas de base, o puru chi sunt aumentende sos prejos de listinu de su produtu cumpletu. Pro la nàrrere sintètica, cumbeniat a comporare pc s’annu coladu. Como chi semus intrende in una fase noa de su tempus benidore, cantu balet su ditzu “sena memòria non b’at unu cras”?
Gianfranca Orunesu
(Foto de Richard L)
Leave a comment