Comente onni annu est essida a campu sa classìfica de su Sole24Ore pro sos crìmines intro a s’Istadu italianu, partzidas pro provìntzias: comente sunt postas sas bator sardas?
Tàtari est sa de chimbanta intro de sas chentu e ses cunsideradas pro s’anàlisi. Sos delitos prus numerosos sunt sos omitzìdios proados, in ue su nord Sardigna est sa de noe in totu s’Itàlia. Àteru problema mannu est sa droga, e nde amus faeddadu inoghe àteras bortas (incarca), in custu crìmine Tàtari est in su giassu nùmeru binti. De sas àteras genia de delitos in ue b’at de pònnere mente b’at sos isrobatòrios in sas butegas e sas trassas informàticas.
Nùgoro est sa provìntzia prus male posta, est sa de barantoto. Sas genias de delitos in ue est prus in artu in custas classìfica sunt mescamente tres: isrobatòrios cun ricatu (positzione bator), omitzìdios proados (sa de sete) e ochisuras (se de noe). Pro su restu fintzas inoghe b’at carchi problema cun sa droga (positzione bintighimbe) e cun sas trassas informàticas (est sa de trintatrès).
Aristanis est sa provìntzia prus segura de s’intreu Istadu italianu. S’ùnicu datu prus artu de sa mèdia sunt sos omitzìdios proados, in ue est in sa positzione sèighi. Pro s’àteru su chi podet pònnere pidinu est sa droga (positzione barantatrès) e sos assòtzios pro delìncuere (barantunu).
Casteddu est in mesania a cunfrontu de sas àteras tres: est sa de otantunu. Sos problemas peus de su sud Sardigna sunt sas ochisuras (positzione binti) e sa droga (bintinoe) e sas ochisuras de criaduras in ue sa provìntzia de Casteddu tenet sa positzione bintunu. Fintzas inoghe sas trassas informàticas ant un’importu mannu, est sa de trinta. Su delitu diferente dae su restu de Sardigna est sa fura pro iscòrriu.
In Itàlia sos logos prus perigulosos sunt Milanu, Bologna e Rìmini, in su mentres totus sas provìntzias sardas sunt a suta de sa mèdia de s’Istadu. Bisòngiat de nàrrere però chi in Sardigna b’at prus crìmines violentos a cunfrontu de àteros logos, ma meda de mancu de furas e isrobatòrios.
Pro bìdere sos datos intreos incarca inoghe.
(redatzione)
Leave a comment