S'Edipu in grecànicu bogadu a campu dae Lisandru Serra

Sa  minoria linguìstica grega de Itàlia, gasi comente l’at reconnota  s’Istadu italianu, est formada dae sas  duas ìsulas linguìsticas de sa Bovèsia, in sa  tzitade metropolitana de Reggio Calàbria, e de sa Grètzia salentina , in su Salentu, e dae sa  comunidade grega de Messina.

Como podimus intèndere s’Edipu retzitadu finas in custa limba.

Lisandru  Serra, regista, autore, artista visivu e fundadore de sa compannia “Teatropersona”, at cuidadu regia, iscenas, lughes, sonos e costùmenes de s’ispetàculu “Il Canto di Edipo”, chi faghet parte de su progetu nou suo chi si narat “Tragùdia – Il Canto di Edipo”. Lisandru Serra, lu depimus ammentare, est su chi annos a como aiat bogadu a campu su Machbeth in limba sarda.

  “Il canto di Edipo” lu rètzitant in grecànicu sos atores Alessandro Burzotta, Salvatore Drago, Francesca Gabucci, Sara Giannelli, un’intensu Jared McNeill in sas bestes de su protagonista Edipu, Chiara Michelini e Felice Montervino.

A pustis de s’introdutzione cunfiada a un’isfinge cantadore-ànghelu nieddu, Edipu essit a campu in sas gradinads; pustis b’at movimentos e coreografias chi interessant  tretos diferentes de s’iscena.

In custa rapresentatzione intrant a pare in manera armònica sa mùsica, su cantu e su Cuncordu, custu ùrtmu cunsideradu comente unidade chi inserrat in sesi totu su contu, e comente matèria umana creadora: b’at mamentos chi, ispartzende·si, faghet nàschere pessonàgios sìngulos e atziones iscènicas sìngulas sestadas a ghisa de ballu.

In mesu de totu custu b’est sa sonoridade  de sa limba grecànica (in sa  tradutzione de Salvino Nucera, sutatituladu in italianu), intramesada dae insertos cantados cun retùmbidas de càntigu gregorianu, dae madrigales cun prus de una boghe e dae mùsica isperimentale. Sas partiduras sunt de  Bruno De Franceschi.

(sa redatzione)

Leave a comment