Sos datos econòmicos a subra de s’Itàlia chi at dadu s’Istat contant de unu Paisu chi at agabbadu sa crèschida a pustis de sa pandemia de Covid. Semus torrados a nùmeros cun su zero vìrgula e in una situatzione de fragilidade manna pro su benidore.
Sas isperas de su guvernu Meloni, fintzas fatende su bilàntziu, fiant de nessi s’unu pro chentu. Como s’inghitzat a cumprèndere chi fintzas cussa previsione est tropu arta: su 2024 s’est tancadu cun unu 0,8 e sos isetos pro su 2025 est fundadu mescamente a subra de sas esportatziones. Ma ischimus chi cun sa gherra cummertziale de Trump a s’Europa e a su mundu sa possibilidade de lòmpere a cussa punna at a pòdere èssere prus difìtzile. Sa chistione no est si s’Itàlia at a èssere corfada dae sas tassas americanas, ma si s’Europa intrea at a mudare su mercadu e sas bias de su cummèrtziu, disamparende sas betzas.
Sos datos, in prus, faeddant de unu mercadu de intro chi est menguende. Sos istipèndios sunt bassos a cunfrontu de su restu de Europa e custu influentzat sos consumos e su turismu intre s’Istadu. Ma fintzas sos investimentos non sunt andende bene. Su datu mègius est s’ocupatzione, b’at gente meda chi at su traballu, ma custu no est est megiorende sa produtzione industriale, chi, fintzas cussa, est menguada de unu 3,5%.
Su problema est chi galu su PNRR no est agabbadu, ma pro su chi si podet bìdere, no est renèssidu a mudare de a beru su sistema italianu. Difatis su PNRR paret chi in Itàlia no apat tentu sa punna de mudare un’economia betza e ligada a unu pensu chi non si resesset a annoare, ma a dare dinari a progetos mannos e minores chi una mirada curtza e chi, tando, non sunt dende resurtos.
In su mentres soddos maicantos si nche sunt andados cun s’eco-bonus chi at brusiadu prus o mancu 250 milliardos e chi at fatu suprire su dèpidu pùblicu a sos tres mìgia milliardos tudende sas possibilidades de agiudos (o pro ismanniare sos istipèndios) a setores de importu in sos tempos imbenientes.
Su ritratu chi nd’essit a campu, duncas, ponet pidinu e cunfirma una calidade metzana de sa polìtica italiana.
Gabriele Tanda
Leave a comment